Zokhawtharah tiam chin awm lo total lockdown

Mizoram aṭanga Myanmar luhka pui ber Zokhawtharah chuan tun hnaia zin haw zingah Covid-19 vei rinhlelh a awm avangin nimin zing aṭang khan tiam chin awm loin inkhàrkhip pumhlûm (total lockdown) an kalpui.

Zokhawthar khawtlang hruaitute hnen aṭanga thu dawn danin, an khaw mi, tun hnaia Kolasib aṭanga haw pakhat chu a khua a sik a, thâwk lamah harsatna a neih bawk avangin Covid-19 a kai rinhlelhna a awm a; chuvang chuan vènthàwn thilah nimin zing khawvar aṭang khan total lockdown (curfew) an puang a ni.

Kolasib aṭanga haw mi pakhat damlo chu Inrinni khan Zokhawthara clinic-ah kalpui a ni a, Inrinni vêk khan Champhai District Hospital panpui niin, endik turin a swab sample lâk nghal a ni. Kolasib aṭanga haw chu taksaa harsatna a neih hmain a ṭhiante nen inkâwma an lèn kual hman avangin invènthàwn thilah total lockdown an puan thu leh contact tracing tih nghal char char a nih thu an sawi a, "Sample test kan nghâk a, result a chhuah hunah kan awm zel dan tur chu a chiang ang," an ti.