Sorkara a nghet loa thawkte'n Na zawka sorkar nawr an tum ; 'CM-ah appointment kan hmu thei lo' - PEA

Sorkara a nghet loa thawk inzawm khawm pawl, Provisional Employees Association (PEA) chuan an thil phût hrang hrangte sorkarin a ngaihsak ṭha duh loa an hriat thu an sawi a, "Sorkar kan ko eih zo lo a nih chuan na zawkin kan kal ve thei. Chief Minister hmuh kan tum pawhin kan hmu thei tawh lo," an ti.

PEA hruaitute chuan nimin khan Aizawl Press Club-ah thuthar thehdarhtute an kâwm a; an president Lalhruaitluanga Sailo chuan, provisional employee 8,500 vel an awm mek thu sawiin, "Hah takin hlawh tlém zawkin kan thawk ṭhin a, kum sarih kan thawh tlin chuan kan regular dawn tih kan hriatin kan hlim ve ṭhin," a ti a, vuivaina hranpa an neih ngai loh thu a sawi.

Lalhruaitluanga Sailo chuan, an ngheh ve theihna scheme chu kum hnih dáwn kal ta, May 25, 2020 aṭangin sorkarin austerity measure hmanga an tihtàwp thu sawiin, "Hei hi hriatthiam har kan ti hle a, min phelhsak ngei turin sorkar kan phût a ni. Austerity measure hmanga PEA hamṭhatna min tihtawpsak laiin, regular staff-te hamṭhatna promotion leh MACP-te a kal thei reng thung," a ti.

PEA hruaitute chuan, austerity measure hmangin an thawhpui ṭhenkhatte chu an ngheh hun turah an nghet thei lo tih sawiin, "Kum over avanga chhuah phahte pawh an awm hial. Anni hian hamṭhatna eng mah an nei lo a, an thawh hnuhnun ber thlaa an hlawh kha sorkar aṭanga an hmuh hnuhnun ber chu a ni mai," an ti a; kum upa lam tawh tan chuan kawng thar reh leh a harsat tawh thu an sawi.

PEA hruaitute chuan, austerity measure-in provisional employee náwlpui a nghawng laiin, austerity measure hman ṭan hun May 25, 2020 aṭanga December 31, 2021 thlengin Mizoram sorkarin a nghetin mi 498 a la tawh. Sorkarin a ngheta a lâkte chu group A-ah mi 76, group B-ah mi 121, group C-ah mi 254 leh group D-ah mi 47 a ni.

Austerity measure chuan hmelhriat leh tihpuitu nei lote a dan laiin, hmelhriat leh tihpuitu nei ṭhate chu a dang ve chuang lo nia a lan thu sawiin PEA hruaitute chuan, "Mi harsa tak tak PEA member-te ngheh ve theihna tur danchah a nih laiin, department hrang hrangah hna thar lak chhunzawm a ni reng si a, hriatthiam harsa kan ti hle a ni," an ti. 

PEA hruaitute chuan, austerity measure hman a nih reng laiin Finance department chuan provisional employee kum 10 leh a hnuai lam chauh service nei tawhte tan regular theihna tur thupek (order) a chhuah thu sawiin, "Provisional Employees Scheme hi Finance department khawih ni loin, DPAR khawih a ni," an ti a; Finance department-in an kuang lo an nawr bakah, Council of Minister thu an palzût tih an sawi.

New Pension Scheme hnuaia inziah luh ve sorkarah an ngen thu sawiin PEA hruaitute chuan, "Ruahmanna kan siam dan chuan sorkar sum cheng khat pawh a hek dawn lo. He scheme-ah hian min ziak lut ve phawt se, member-te'n pawisa kan thawh khawm hmangin kan member pension-a chhuakte chhuahpui tur kan pe ve thei dawn a ni. Hei pawh min tihsak duh chuang lo," an ti.

October 2021 khan chief minister Zoramthanga a pisaah an kawm thu sawiin, "Data-te la khawm ula, department tina kan member group C leh D aṭanga a senior panga ve ve thlang turin min ti a, senior-te chu dah ngheh dan zawn an nih tur thu min hrilh a ni," an ti a, data an tihfel hnuah CM chu ṭum thum vel hmuh an tum leh tawh a, CM-in hun a pek theih loh thu an sawi.

PEA hruaitute chuan, thuthar thehdarhtute hmaa an lungawi lohna puan chhuah chu an hmalak tàwpna a nih dawn loh thu sawiin, "Sorkarin min bengkhawn duh lo a nih chuan ruahmanna kan siam lâwk. Tih dan tur kan hre ve a, na zawkin kan kal thei. Department tinah post pawimawh tak tak kan member-te'n an chelh ve a, sorkarin kan pawimawhna haider mah se, na zawkin kan kal ve thei a ni," an ti.

PEA hruaitute sawi ṭhenkhat
1) 25.5.2020 aṭangin sorkarin austerity measure hmangin kan ngheh ve theihna min tihtawpsak
2) Austerity measure hmangin a huna kai sang thei lo leh kum over vanga chhuak tate an awm
3) Austerity measure hman a nih hnuah sorkarin a nghetin mi 498 a la tho
4) Sorkar sum tel loa kan member-te'n an kum over hnua an chhuahpui ve theih tura ruahmanna kan siam min pawmsak duh lo
5) Sorkarin kan pawimawhna haider mah se, na zawkin kan kal ve thei
6) CM-in department tina senior panga dah ngheh dan zawn min tiam hnuah hmuh kan dilin hun min pe duh tawh lo