Poshan Abhiyaan hnuaia thawkte'n Thla 7 chhung hlawh an la tawh lo

Women and Child Development (WCD) department hnuai Poshan Abhiyaan scheme-a thawkte chuan July 2021 aṭangin, thla sarih chhung hlawh an la tawh lo. He scheme hnuaiah hian Mizoram hmun hrang hrangah mi 100 vel an thawk.

Vanglaini thu dawn danin, Poshan Abhiyaan scheme hnuaia thawkte hlawh hi sorkar laipuiin 90% a tum a, state sorkarin 10% a tum thung. Hlawh an lak loh rei avang hian WCD hotute chuan an department sum aṭangin nikuma July leh August thla hlawh tur chu an ruahmansak a, an hlawh tur sorkar laipui aṭanga an hmuh huna hnawhkhah leh mai turin an ti a; mahse, chu pawh chu Treasury aṭangin pek chhuah a la ni lo.

WCD hotute chuan Vanglaini palai zawhna chhangin, Poshan Abhiyaan Scheme hnuaia thawkte'n hlawh an lâk loh rei chhan chu sorkar laipui aṭanga sum an hmuh loh vang a nih thu an sawi a, "Kan nawr ve reng a, mahse, an rawn pe chhuak thei lo a ni. Mizoram chauh a ni lo a, India ram hmun danga thawkte hlawh tur pawh an pe chhuak thei bik chuang lo," an ti.

Poshan Abhiyaan-a thawkte hlawh tur chu an la nawr chhunzawm reng thu sawiin WCD hotute chuan, "Ministry lam pawh kan dàwr reng a, a khawihtu an inthlak nen, an la rawn tifel thei lo," an ti a; theihtawp chhuaha an nawr chhunzawm zel tur thu an sawi a ni.