KHAWTHLIR

ASHA châwl dawn
Accredited Social Health Activist (ASHA) volunteer-te chuan hun rei tak chhung lawmman an lak tawh loh avangin naktuk aṭang hian hna an chawlhsan rih dawn. Mizoramah ASHA volunteer 1,091 an awm mek a; lawmman an lak hnuhnun ber chu August 2021 kha a ni.

IAAS kaisang
Comptroller and Auditor General of lndia chuan nimin khan Indian Audit and Accounts Service (IAAS) officer pahnih kai sanna order a tichhuak a, Mizoram sorkara Finance commissioner ni mek Vanlalchhuanga chu principal accountant general rank-ah a kai sâng a ni.

Cyber helpline
Sorkar laipuia Ministry of Home Affairs chuan internet kaltlanga pawikhawihna (cyber crime) kaihhnawiha ṭanpui ngaite tan helpline no. 155260 a siam thar. Helpline hi Mizo ṭawnga biak theih a ni a, hmang ṭangkai ṭheuh turin mi tin chah an ni.

CM Relief Fund
Mizoram Adhoc Aided Middle School Teachers' Association chuan, nimin khan Chief Minister's Relief Fund-ah Rs 7,54,932 an chhûng lut.

Kiosk thar hawng
State Field Laboratory Unit chuan nimin khan Sikulpui, Mission Vengah Covid-19 swab sample endikna Kiosk an hawng thar. Kiosk-ah hian RT-PCR, RAT leh FIA hmanga endik turin sample lak theih a ni a, a duh apiang tan pan theih a ni. Sikulpuiah vek hian Covid-19 vaccine leh booster dose kum 60 chin chung lam leh natna benvawn neite tan chawhma dar 10 aṭanga chawhnu dar 2 inkarah lâk theih reng a ni bawk.

AR-in tanpuina hlân
Assam Rifles chuan nimin khan Zokhawsang, New Vaikhawtlang leh Hnahlan khuaah fahrah naupang leh mamawh zualte hnenah ni tin mamawh chi hrang hrang an pe. Ṭanpuina hi mi 88 hnenah an hlân a ni.