Covid-19 inkaihhruaina sawiho

January 30, Pathianni khan Health minister Dr R Lalthangliana hoin sorkar hotute leh pawl aiawhte'n Secretariat con­ference hall-ah Covid-19 inkaihhruaina chung chang an sawiho.

Dr R Lalthangliana chuan, ṭhutkhawm koh a nih chhan sawiin, SDMA State Executive Committee-in Covid-19 inkaihhruaina hman chhunzawm tur a tih chungchangah Chief Minister-in thil ṭhenkhat ennawn ngai bik a tihte sawiho tur a awm vang a nih thu a sawi.

Hetih lai hian, ṭhut­khawmnaa sawiho chung changah hian nimin tlai dar 5 thleng kha chuan sorkar aṭangin thupek/hriattirna tihchhuah a la awm lo nia hriat a ni a; SEC chairman Dr Renu Sharma-i'n thupek a tihchhuahah chuan January 7, 2022-a inkaihhruaina tihchhuah hman zui zel a nih tur thu a chuang thung.

Inkaihhruaina sawiho ṭhenkhat
# Red zone-ah biak-in hawn leh sakhaw thila pun khawmte khap a ni a, zing ṭawngṭai inkhawm phal a ni.
# Red zone puan lohna hmunah chuan tualchhung kohhran hruaitute'n ruahmanna an siam ang.
# Zing/tlai walk leh cycling exercise-te mi panga aia tam loin neih phal a ni a, Aizawlah gym hawn phal a ni lo.
# Bazar leh dawr hmunte hawn phal a ni a, red zone-ah chuan DC-te'n a inchhâwka inhawn dan tur an ruahman ang.
# Aizawl New Market-a dawr hawn dan tur chu Commerce & Industries Secretary-in a ruahman ang.
# Damdawi lam hnathawh a khaihlak loh nan SLETOCOM chu NGHAM-te râwna damdawi lama hnathawkte tana inkhung hran dan tur inkaihhruaina bik siam tura ruat a ni.
# Bazara mipui tamna hmunah nunphung endik turin executive/police duty dah a ni ang.
# Vantlang mamawh dan azirin community covid care centre siam belh zel ni se.