Lawngtlai district-a ráltlân zingah Covid-19 vei mi 298 hmu tawh

Lawngtlai District Level Committee on Myanmar Refugees chu an chairman Dr Andrew H Vanlaldika, bawrhsap hoin nimin khan a vawi hnih nan DC conference hall-ah an ṭhukhawm a; Myanmar ráltlânte dinhmun leh mamawh te, chhawmdawl leh enkawl zui zel dan turte an sawiho. Lawngtlai district-a ráltlân zingah Covid-19 vei mi 298 hmuh a ni tawh.

Dr Andrew H Vanlaldika chuan, January 27-29, 2022 chhunga district chhung hmun hrang hranga ráltlânte awmna hmun a tlawhnaa a thil hmuh leh hmalak dan a tarlang a; Task Group on Myanmar Refugees nodal officer TT Beikhaizi, Lawngtlai SDO (Sadar)-in Lawngtlai district-a Myanmar ráltlânte enkawlnaa hmalakna kalpui dan a sawi bawk.

Nodal Officer tarlan danin, Lawngtlai district-ah Myanmar aṭanga ráltlân lut mi 5,300 chhinchhiah a ni tawh a, kum 18 chung lam mi 3,522 awmin, mipa 1,783 leh hmeichhia 1,739 an ni a, kum 18 hnuai lam mi 1,778 an awm.

Ráltlânte chu an khawsakna, ei leh in tur leh damdawi bakah, an mamawh hrang hrang a ṭul anga ngaihtuah a ni a, camp hrang hrangah dan lam inzirtirna kalpui mek a ni bawk.

Ráltlân lut tharte chu Covid-19 an vei leh vei loh endik hmasak ṭhin a ni a, an zingah Covid-19 positive mi 298 hmuh chhuah tawh niin, hripui vangin mi pakhat a thi tawh. Hripui vei mek mi 14 an awm a; mi 1,553 hnenah Covid-19 vaccine dose khatna leh mi 336 hnenah dose hnihna pek tawh a ni.

Myanmar ráltlânte chêt vel dan vil zui a nih theih nan an mimal chanchin nen uluk taka chhinchhiah hna kalpui mek niin, identity card pek vek tura ruahman a ni a, ID card 98 siam a ni tawh.