Covid-19 vangin kan kawngte A ṭhat tur angin a ṭha lo - CM

Chief minister Zoramthanga, PWD enkawltu ni bawk chuan nimin khan Buichali leh Khamrang inkara National Highway (NH)-54 chhe laite leh NH-154 (Bairabi kawng) siamṭhat dan tur a enfiah a; Covid-19 vangin Mizorama kawngpuite chu a ṭhat tur anga a ṭhat theih loh thu a sawi.

Chief Minister chuan, Kawnpui kawng chu NH a nih avangin central sorkar kut a nih thu sawiin, "Contract pekna turin process chi hrang hrang, thu leh hla an ngah lutuk a, rin aiin a fel har. Nasa takin kan nawr a, an duh anga an tihchak theih loh chhan chu Covid-19 vang a ni. A kar lakah a harsa zual lai chu NH ni mah se, ṭhál laiin state sumin theih tâwkin kan ti. Covid-19 vangin kan inkharkhip vek a, a tih hleih theih loh. Covid-19 vangin kan kawng pawh a ṭhat tur angin a ṭha hlei thei lo a, a chhe ta a ni," a ti.

Buichali aṭanga Khamrang inkar kawng chhia chu a siam theih dan tur a hma pawhin a en tawh thu sawiin Zoramthanga chuan, "Central-in thawk turin Ratna company an pe. Mahse, instruction tharah motor kháwl hmangin a chhiat dan lak vek a, thawh zawha lak leh tur a ni. Chutiang khawl chu hmarchhakah pawh kan hmu pha lo," a ti a; kháwl hmanga enfiah hmasa kher loa hnathawh phalsak turin sorkar laipuia minister a ngen thu a sawi.

CM Zorama chuan, PWD-in Chief Minister leh central minister inbiakna angin hnathawh ṭan theih a nih tawh thu Ratna company an hrilh tih sawiin, "Vanduaithlak takin Covid-19 vangin an labour-te an hawtir hman tawh. PWD lamin labour a theih ang ang zawngin hna thawh mek a ni," a ti.

Chief Minister hian amah ṭawiawmtu Supply Minister, PWD leh Supply department official leh Railways hotute nen Bairabi rél chawlhhmun panna kawngpui (NH-154) an enfiah nghal a, siamṭhat dan tur an ruahman. Bairabi rél chawlhhmun panna kawng, Railways approach road chu tun hnaiah a chhiat leh tawh avangin réla buhfai lo thlengte kudama phur lut turin truck lian full load a kal thei lo a ni.

Aizawl pana a haw kawngah CM Zoramthanga chuan Seṭhawna ruihhlo ngaite enkawlna hmun tur changtlung zawk siam mek a tlawh nghal bawk. Seṭhawnah hian Deaddiction and Rehabilitation Centre dinna tur ruahman a ni a, mi tam zawk awm theihna turin tihchangtlun hna thawh mek a ni.