Pathiannia Covid-19 positivity rate 28.73%

January 30, Pathianni khan Mizoramah swab sample 2,805 endik aṭangin Covid-19 vei mi 806 hmuh chhuah a ni a, positivity rate chu 28.73% a ni. Nimin khan hripui vei dam tawh mi 1,740 chhuahtir an ni a, hripui vangin mi pahnih an thi.

Covid-19 vei Pathiannia hmuh thar mi 806-te chu mipa 345 leh hmeichhia 461 an ni a; TrueNAT hmanga hmuh 11 leh RAT hmanga hmuh 795 niin, an zinga mi 561-in symptom an nei. RT-PCR laboratory-ah leh FIA hmangin sample endik a ni lo.

Kumin January thlaah hripui vei mi 30,828 hmuh chhuah tawh a ni a; swab sample lâk leh endikah thla kal mek la zo lo mah se, January thla hi Covid-19 positive hmuh tam lamah pahnihna a ni tawh a, hmuh tam ber thla September 2021 khan sample 2,31,281 endik aṭangin positive 34,831 hmuh a ni.

IPR tarlan danin, Pathiannia Covid-19 positive 20 aia tam hmuhna khua leh veng pali a awm a; Keifangah mi 68, Kulikawnah 49, Durtlang North-ah 48 leh Bethlehem Vengthlangah mi 23 hmuh a ni.

Nimin tlai dar 5 thleng khan hripui vei dam tawh mi 1,740 chhuahtir an ni a; district tina chhuak zat chu - Aizawlah mi 1,097, Lungleiah 180, Saitualah 172, Mamitah 124, Kolasib-ah 57, Serchhipah 49, Champhaiah 34, Lawngtlaiah 15, Hnahthialah pasarih leh Siahaah mi panga an ni.

IDSP record angin, Mizoramah Covid-19 vei 1,72,491 hmuh chhuah a ni tawh a, mipa 81,792 leh hmeichhia 90,699 an ni a, mipa aiin hmeichhia 8,907-in an tam zawk. Nimin tlai dar 5 thleng khan mi 1,59,324 (92.37%) chhuahtir an ni tawh a, mi 608 (0.35%) thi tawhin, enkawl mek mi 12,559 (7.28%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,72,492 chu mi 1,000 zelah hripui vei mi 157 an awm ang a ni a; mi 1,00,000 zela Covid-19 vangin mi 55 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 30, 2021 thlenga swab sample endik tawh 16,67,937 aṭanga RT-PCR hmanga endik zat percentage chu 20.64 a ni a, RAT hmanga endik zat chu 73.62% a tling.