Pawisa an sem thei a nih chuan a hun takah hlawh pe tawh rawh se - MPYCC

Mizoram Pradesh Youth Congress Committee (MPYCC) chuan thuchhuah siamin, Mizoram sorkar chu pawisa a sem thei a nih chuan sorkar hnathawkte hlawh a hun taka pe turin an phût tih an puang.

MPYCC chuan, January 28, 2022-a Kolasib-a MNF diamond jubilee lawmnaah MNF president leh chief minister Zoramthanga’n chhungkaw 50,000-60,000 hnenah SEDP sum sem an tum thu leh Kolasib-ah chhungkaw 1,000-2,000 vel lo thlang tura a chah thu sawiin, “Hetianga pawisa an sem thei a nih chuan Mizoram ei leh bar innghahna lian bera ngaih sorkar hnathawkte hlawh hi a hun takah pe turin kan phût,” an ti.

MPYCC tarlan danin, sorkar hnathawk group A leh B-te December 2021 hlawh Mizoram sorkarin a pe thei lawk lo a, kumin January ni 17-ah a pe chauh a; sorkar hnathawkte hlawh pek mumal loh chu sorkar hnathawkte chauh ni lo, Mizoram mipui mimirin nasa takin an tuar vek a ni.

Congress ṭhalaite chuan, January thla tawp, ni 31 a ni leh tawh tih sawiin, “Sorkarin thla thar hma ni hnuhnung bera a mi chhawrte hlawh a pek theih loh pawhin, thla tìr ni khatah hlawh pe ngei tawh rawh se,” an ti.

MPYCC chuan, restricted tender hmanga thil ṭul hmasa ni loa sum tam tak sên ṭhin a nih thu sawiin, “SEDP pawisa tam tak sem tum a nih mek lai hian thil pawimawh hmasaa pawisa awm lo tih hi chhuanlam tlingah kan ngai lo,” an ti a; mau chî supply-na atana supplier mi pathum hnena cheng vbc. 15 sêng thei sorkarin sum a nei tih chu an pawm dan a nih thu an tarlang.