MPCC, MNF leh BJP-in bial 40 chuh tum ; ZPM leh PRISM-in an chuh kim dawn lo

Kumina Mizoram Legislative Assembly inthlanpui neih turah Mizoram Pradesh Congress Committee (MPCC), Mizo National Front (MNF) leh Bharatiya Janata Party (BJP) chuan bial 40-ah candidate dah kim an tum a; Zoram Peoples' Movement (ZPM) leh PRISM party chuan chuh kim an tum lo thung.

MPCC treasurer H Liansailova chuan Vanglaini palai zawhna chhangin, Nomination Committee an la ṭhut mumal loh thu a sawi a, "Ṭum khat chu thingpui in pahin kan ṭhu ve zawk tawh. Mumal zawka ṭhutkhawm tum mek a ni," a ti a; sawiho la awm chiah lo mah se, bial zawng zawng an chuh ngei a rin thu a sawi.

MPCC Nomination Committee member leh vice president R Lalzirliana'n an hnawhchhuah tâk vanga member dang an ruat belh dawn leh dawn loh zawhna chhangin H Liansailova chuan, "Member ruat belh chungchang hi kan la sawiho lo," a ti.

Vanglaini palai zawhna chhang­in MNF vice president Dr R Lal­thang­liana chuan candidate an tifel thawkhat tawh tih a sawi a; "Official-in kan la puang lo chauh a ni," tiin, Assembly constituency zawng zawng an chuh dawn thu a sawi.

MNF Vice President chuan, thawhpui an neih dawn leh dawn loh zawhna chhangin, "Tumah thawhpui kan tum lo a, bial zawng zawngah kan mal din vek dawn a ni," a ti.

ZPM chief minister candidate Lalduhoma chuan candidate an siam fel tawh tih sawiin, "Engkim kan tifel tawh a, kan puang thei reng tawh," a ti a; inthlan hun puan a nih hnuah an candidate turte an puan tur thu Vanglaini a hrilh.

Lalduhoma chuan, constituency pahnihah candidate an neih dawn loh tih sawiin, "Candidate kan neih lohna tur hi Chakma area-a bial pahnih a ni. Tumah thawhpui kan nei dawn lo a, bial tinah ZPM kan mal din ang," a ti.

Vanglaini palai zawhna chhangin BJP president Prof. JV Hluna chuan candidate tur an la tihfel lo thu a sawi a, "Bial viltu kan inruat a, anni hi candidate tura hualte chu an ni a, an perfomance pawh a ṭha," a ti a, candidate puang tur chu central BJP pawmpuina a ngaih thu a sawi.

Bial zawng zawngah candidate neih an tum thu sawiin JV Hluna chuan, "Thawhpui nei loin bial tinah candidate neih kan tum. Chutih rualin, Congress party tih lo chu prime minister Narendra Modi thil tum leh hmalakna thláwp apiangte chu kan thawhpui thei vek a ni," a ti.

PRISM party president Van­lalruata chuan Vanglaini palai zawhna chhangin, constituency 40-ah candidate an dah vek dawn loh thu a sawi a, "Chakma area-ah pawh Mizo dah kan tum a, mahse, candidate tur kan hmu lo. Bial zawng zawng kan chuh theih hmel loh," a ti a; candidate tur awm se chuan bial zawng zawng an chuh tur thu a sawi.

Candidate tur eng emaw zat an tifel tawh tih sawiin Vanlalruata chuan, "Tunah hian bial eng emaw zat kan tifel tawh a, hengte hi kan puang zo phawt ang. Chumi hnuah bial la tihfel lohte kan rel ṭha leh ang," a ti.