Serchhip bialah PRISM President

PRISM chuan nimin khan Serchhip Bazarah inkhawm an buatsaih a; an senior vice president Dr H Lallungmuana chuan, PRISM president Vanlalruata chu Serchhip bialah a din tur thu a puang a, Tuikum bialah RC Rohmingthanga leh Hrangturzo bialah RL Liantluanga an din tur thu a puang bawk.

Inkhawm hi PRISM treasurer HK Liansawta'n a kaihruai a; Dr H Lallungmuana chuan, kan ram kalphung pangngai hian hma min sawnpui lo tih sawiin, "He kalphung hlawhchham hi hlawhtlin pui ngei tur kalphunga thlak thawk a ngai. Thingkung tar lian pui pui, rah chhuah thei tawh lote hi rah chhuah tur thingtuai ṭhaa kan thlak a ngai a ni," a ti.

PRISM president Vanlalruata chuan, Serchhip bialtu MLA Lal Thanhawla chu pa ropui tak ni mah se, hnathawh ropui a nei tam lo thung niin a sawi a, "In duhkhawp loh ṭhin mai piah lamah tunah chuan a kum a lo tam ta a, amah in hmuh duh pawhin a monu in hmuhte a ngai ta a ni," a ti a; an sorkar chuan eiru an man dawn avangin, Chief Minister hlui pawh lung-ina táng an awm tur thu a sawi.