CM Phoenix Project kalpui dawn

MZP chuan nimin khan Hawla Indoor Stadium-ah Inter Higher Secondary School Basketball Taurnament 2018 an buatsaih ṭan a, Mizoram Youth Commission (MYC) chairman Joseph Lalhimpuia, MLA-in a hawng. Khuallian chuan, Mizo ṭhalaite tan 'CM Phoenix Project' kalpui tum a nih thu a sawi.

Joseph Lalhimpuia chuan, "CM Phoenix Project atan hian cheng nuai 20 dah a ni a, Mizo ṭhalai zinga competitive exam hma­chhawn tum, mi tumruh leh leh­khathiam thlang chhuakin, chungte chu New Delhi-ah exam inbuatsaih turin MYC-in a châwm dawn. Mizo ṭhalaite civil service-a an luh ngei theih nan MYC-in hma a la zel dawn a ni," a ti.

MYC Chairman chuan, Mizote chu competitive world-ah an awm tih sawiin, "Mi taima leh tumruhte hi mi hlawhtling an ni a, ruih theih thila fihlim lo tan hlawhtlinna a awm tawh lo," a ti a; MZP-in zirlaite taksa hriselna tura intihziakna an buatsaih chu lawmawm a tih thu a sawi. MYC-in Mizoram pumah ṭhlaite pualin basketball leh badminton tournament siam an tum thu a sawi bawk.

Inter HSS Basketball Rournament 2018-ah hian sikul 23 an tel a, September 28-ah final khelh a ni ang.