MNF-in Martar Ni hmang

MNF party chuan nimin hman Aizawl leh Mizoram hmun hrang hrangah Martar Ni (Martyrs Day) vawi 38-na an hmang a, MNF general headquarters-a hruaitute'n hmun 14-ah an hmanpui.

MNF president Zo­ramthanga chuan Mamit Chhimveng YMA Hall-ah a hmanpui a; thu sawiin, "Zoramin zalenna a sualna leh martarte sawi nêp tum páwl an awm ṭhin hi a pawi a, tunah erawh chuan ṭhangthar­te'n 'Zoram Ni' te hmangin Mizo mipuite'n an champion pui chho zel hi a lawmawm tak zet a ni. Martarte thih chhan 'Pathian leh kan ram tan' tiin i inhlan thar ang u," a ti.

Zoramthanga chuan, zalenna sualnaah martar 2,000 - 3,000 vel awma an hriat thu sawiin, "Martar ruang la lak loh, an phûmna leh an chin hriat loh eng emaw zat an awm a, an awmna kan hriat Mizoram, Burma leh Bangladesh lama mite pawh la seng khawm loh kan nei nual a ni," a ti a; martarte chu Martarte Thlanmualah a theih chin seng khawm zel an tum thu a sawi.

MNF senior vice pre­si­dent Tawnluia hoin zing karah Martar Thlanmual, Mualvawmah martarte zahna leh chawimawina pangpar dah a ni a; Tawnluia chuan, "MNF kan sorkar chuan martar chhung leh khatte leh ram leh hnam tana tuartute ngaihsak hmasak an ni ang. Mizo nationalism meichher hi chhi êng zel turin ṭan i la zel ang u," a ti.

MNF vice president R Tlanghmingthanga chuan MNF Ṭawi East Block huaihawtin Saitual BRC Hall-ah a hmanpui a; Mizo hnam martarte'n anmahni leh an chhungte tan an nun an hlan lo a, Mizo mipui zawng zawng tan an hlan tih sawiin, "Special category state kan nihna te, kan inhung bikna Aritcle 371/G leh ILP-te hi kan hnam martarte thawh rah a ni," a ti a; Mizo hnam tana martarte chu Mizote tan ro hlu ber an nih thu a sawi.

MNF vice president dang Dr R Lalthangliana chuan, Maubuang khuaa Awithangpa Hall-ah hmanpuiin thu a sawi a, "Hnam fing leh ropui apiangin martarte an chawi­mawi nasa a, an ram tana thisen leh nunna petute hi an hlut ṭhin. He hnam party hi martarte hian an tiropui a, martarte thisen hian he hnam hi min chawimawi a ni. Kan martarte leh hnam move­ment avangin he party hi a chuai dawn lo," a ti.

MNF treasurer Van­lalzawma chuan Khaw­lailung Bunghmunah Martar Ni a hmanpui a; thu sawiin,"Ram leh hnam tana nun hlantute hian an ṭhat lai, an vânglai hun ram leh hnam tan an hlan a, keini hian an nihna angin kan chawimawi pha lo zawk a ni," a ti a; hnam sipaite thisen a thlawna a luan loh thu leh an martarna chu MNF tan chauh ni loin, Mizo zawng zawng tan a nih thu a sawi.