KHAWTHLIR

MPCC v. president thar CL Ruala
Mizoram Pradesh Congress Committee (MPCC) president Lal Thanhawla chuan nimin khan an Constitution tlawhchhanin CL Ruala, Lok Sabha MP ni lai chu MPCC vice president atan a ruat a, a nih hun chhung tur chu tuna hruaitute term ding lai ang a ni. Tarlan tawh angin, MPCC chuan an vice president R Lalzirliana chu September 17, 2018 khan an hnawt chhuak a ni.

Tlan phal lo
Traffic SP chuan thupek chhuahin, PWD-te'n ngenna an siam angin, September 20-21 chhung hian Zarkawt Traffic Point aṭanga CM bangla panna kawnga tuihâwk luankawr siamṭhat a nih dawn avangin, hna thawh chhungin lirthei tlan phal a nih dawn loh thu a tarlang.

Voters Kûtpui
Nimin khan Aizawl DC Dr A Muthamma hoin DC conference hall-ah college prinicpal, HISLAM leh Aizawl City Joint Students’ Union aiawhte an ṭhukhawm a; higher secondary zirlai leh college zirlaite hnena inthlan pawimawhna leh EVM leh VVPAT inhrilhhriatna hun 'Voters Kûtpui' hman dan tur an rel. Voters Kûtpui hi October 5-6 chhungin Vanapa Hall-ah hman an rel a ni.

Lungphùm phúm
Champhaia Education Training Centre sak tur lungphùm chu nimin khan School Education minister H Rohluna'n a phúm. Education Training Centre hi DEO Complex, Champhai Kahrawtah NEDP aṭanga hmuh cheng nuai 200 hmangin sak a ni dawn a; zirtirtute trainning-na tur hmanrua bakah, mikhual thlennate a awm dawn a ni.

Minister-in hawng
Mamit Venghara Mamit District Transport Office building thar leh staff quarters chu nimin khan Transport minister John Rotluangliana'n a hawng. DTO Office hawn tak hi mimal in sak sa, cheng nuai 100 senga lei a ni.

Young Achievers’
Mizoram Youth Commission (MYC) chuan vawiin tlai dar 2:30 hian Pachhunga University College Auditorium-ah Young Achievers’ Award hlanna inkhawm an buatsaih dawn a, Finance minister Lalsawta khuallian a ni ang. Young Achievers’ Award hi ṭhalai kum 40 hnuai lam, mahni kalna kawnga hlawhtlingte hnenah hlan a ni dawn a, district tin aṭangin mi pakhat ṭheuh, an vaiin mi pariat hnenah hlan a ni ang.