KL Liana kan chán ta

Mizo pa lâr KL Liana (67) s/o K Lalhela (L), Tuikual North, Aizawl chu nimin tlai dar 3 khan a thi a, vawiin chawhma dar 10-ah vui a ni ang.

KL Liana hi kum 1953 khan Sumsuih khuaah a piang a; Aizawl College aṭanga B.A a zawh hnuah L.LB a zo a, NEHU hnuaiah pahnihna a ni. March 4, 1981-ah J Vanlalruati nen an innei a, fa pali - mipa pathum leh hmeichhia pakhat an nei.

Private school leh sorkarah hna hrang hrang a thawh hnuah July 11, 1983-ah Mizoram Judicial Service (MJS)-ah a tling. MJS-a a service chhungin Judicial Officer-II, Law & Judicial under secretary, ADM(J), Addl. District & Sessions Judge, District & Sessions Judge, MACT Presiding Officer-te a ni a, MACT Presiding Officer a nih laiin December 31, 2019-ah pension-in a chhuak.

KL Liana hi thu ziak mi a ni a, chanchinbu hrang hrangah a thu ziak ṭhahnem tak a chhuak tawh. Kum 2013 aṭangin Vanglaini chanchinbu-ah regular columnist a ni a, dan lam kaihhnawih article ṭhahnem tak a chhuah hman.

Kum 2000 khan KL Liana hian Non-Hodgkin’s Lymphoma (NHL) cancer a nei tih hmuh chhuah a ni a, hun rei tak chu cancer hian a tibuai lutuk lo a, hna pawh a thawk zui reng a ni. 2019 kum tìr lam aṭangin harsatna a nei ṭan a, June 2, 2019-ah Ebenezer Hospital-ah dah luh niin, chumi hnua an endiknaah a thlîng (bone marrow)-ah cancer cell hmuh a ni.

November 2019 aṭangin Mizoram State Cancer Institute, Zemabawkah radiotherapy lâktír a ni a, City Hospital-ah admit a ni zauh zauh chungin, damdawi-inah awm reng loin, in lamah nurse-te ruaiin an inenkawl a ni. June 25, 2020 aṭangin zual lam a pan a, oxygen pek deuh reng a ni a, nimin chawhnu dár 3 khan a thi ta a ni.