Zirna tel loin ramin hma a sâwn thei lo - Rohluna

DIET, Champhai administrative building chu nimin khan School Education minister H Rohluna'n a hawng. H Rohluna chuan, zirna tel loin ramin hma a sawn thei lo tih a sawi.

School Education Minister chuan, sorkar­in zirna a ngaih pawimawh thu sawiin, "Sum harsa tak karah pawh zirna tihhmasawn hram hram a tum tlat a. Zirna tihhmasawn hi School Education deparment kutah chauh dah lo a, ṭanrualna ṭha tak leh mahni theih ang ang hmanga hmalak tlan ngai a ni," a ti.

H Rohluna chuan, sorkarin zirna a ngaih pawimawh tluk zetin hmunhma thawm ṭhat a ngai pawimawh nia sawiin, "Tun hnaiah pawh district hrang hranga DIET building tharte hawn a ni," a ti a; Serchhip DIET building pawh remchan veleh tum a nih thu a sawi.

Sorkarin zirtirtu a duh uluk nia sawiin Education Minister chuan, "Zirtiru lak kawng­ah MPSC kaltlang vekin Recruitment Rules ang thlapa kalpui ṭthin a nih avangin, zirtirtu nih tumte chuan thiamna tak tak nei thei tura ṭan an lak a ngai a ni," a ti.

Khuazahawm, Champhai North bialtu MLA TT Zothangsanga chuan Education department hmalakna-a an district mai bakah Mizorama zirna tihchangtlun a ni chu fakawm a tih thu sawiin, "Zirna ṭha nei tur chuan zirtirtu ṭha mamawh a ni a, chu chu sorkarin hriain training centre-te a ti chang­­tlung mek zel," a ti a, trainees-te chu chhawr ṭangkai tum theuh turin a chah.

Champhai DIET building hawn thar hi June 18, 2015-a sak ṭan, September 26, 2016-a sak zawh a ni a, a sak nan cheng nuai 241.19 sen a ni. Classroom, seminar room, library, computer lab, lecturer room, staff room, principal room leh laboratory-te a awm.