STAM-in General Conference an hmang

Science Teachers' As­sociation Mizoram (STAM) chuan nimin khan Synod Conference Centre-ah General Con­ference vawi 33-na an hmang a, Mizoram hmun hrang hrang aṭang­in primary school aṭanga college thlenga science zirtirtute leh science lama tui mi ṭhahnem tak an tel.

Conference-a khual­lian, Science & Technology-a chief scientific officer Dr RK Lallianthanga chuan, Mizoram chu science leh technology lamah hma a sawn ve zel tih a sawi a, "Chutih rualin, science leh mathematics zirnaah hian harh tharna kan mamawh hle. Chumi atan chuan zirtirtute'n science leh mathematics kan tui ve a ngai a ni," a ti.

Conference-ah hian, NIT-Mizoram tihchangtlun a nih theih nan hmalak chhunzawm zel ni rawh se tih te, polythene hman ṭhat lohna leh hlauhawmna nasa zawka inzirtir ni rawh tihte leh, STAM member leh zirlaite tan Science Expedition neih ni se, tihte an rel a ni.

Kum 2017 chhunga Mizoram Science Journal (MSJ) Best Article Award chu Albana L Chawngthu, Pachunga University College hnenah hlan a ni a; Best Contribution Award chu Dr Krista Roluahpuia hnenah hlan niin, Best Agent Award chu Rosebud School zirtirtu Lalhruaitluangi Khawlhring hnenah hlan a ni.