Police-in fimkhur turin mipui chah

Mizoram Police-a public relations officer (PRO) chuan thuchhuah siamin, tunlaiin phone call, email leh social network hmanga inbum a awm fo avangin, mipuite fimkhur turin an chah.

Police thuchhuah chuan, "Tunlai hian phone call hmanga inbumna a hluar hle mai a, mi tam tak, an bank account aṭang-

in pawisa tam tak an rûk chhuahsak tawh a, hemi lakah mi tin kan him theih nan a hnuai­a mite hi zâwm hram turin kan inngen a ni," an ti. Bank account chu amahin a thi ngawt thei lo a, a thi (dormant) a nih pawhin account-ah pawisa dah luh emaw, lak chhuah emawin a nung leh nghal mai thei tih sawiin, bank account chung­changah buaina leh harsatna nei chuan bank-ah kala zawhfiah a him thu an tarlang.

Mizoram Police thuchhuah
1. Phone kaltlangin, mi, i hriat ngaih lohin i bank account number emaw, ATM card emaw a thi dawn tih an rawn hrilh che a nih chuan awih suh.
2. Phone kaltlangin mi tu pawhin i ATM card rawng eng chi kha a rawng pâwl chia thlak a ngai, tia i ATM card number-te pawh dik thlapa rawn sawiin, i phone-ah confirmation code a rawn thleng ang a, chu chu min rawn hrilh rawh an tih che chuan hrilh suh ang che.
3. State Bank of India emaw, bank dang, i account hawnna bank aṭang rawn call che ni âwma insawi an awm chuan i ATM card number emaw PIN emaw, a hnung lama inziak emaw, password emaw pawh hrilh lo ang che. Bank reng reng hian an customer-te phone-in an be ngai lo tih hre reng ang che.
4. I hriat ngai lohin i bank account number emaw ATM card number emaw an dil che a nih chuan hrilh suh.
5. I mobile phone-ah SMS-in one time password (OTP) number a lo thleng a nih chuan tumah hrilh suh.
6. Hetiang phone call emaw, message emaw kan dawng a nih chuan inbumna a ni tih hriain, chhan duh loh emaw, engmah hrilh loh mai tur a ni.
7. SMS/email hmanga lottery emaw, hna (job offer) emaw, thil thlawn pek (gift) emaw i dawng a nih chuan inbumna a ni tih hria la; pawisa thawn suh.
8. Facebook, Whatsapp leh social network dang aṭanga i hmelhriat ram dang miin thil thlawn pek rawn pek che a tum a nih chuan inbum tumna a ni tih hriain hnar zel ang che. A rawn thawn lui che ni anga a insawi phei chuan inbumna a ni tih hre nghal la, sum engmah a lan chhuahna turin pe suh.