MHIP Day vawi 47-na hman a ni

Nimin khan MHIP Day vawi 47-na a ni a, a pualin Mizoram hmun hrang hrangah hun hman a ni. MHIP General Headquarters president Lalthlamuani chuan, tu leh fate tan, ram leh hnam tan theihtawp chhuah zel turin MHIP member-te a chah. MHIP Gen.hqrs. chuan hmun ṭhenkhatah ṭanpuina thilpek an hlân a ni.

MHIP Day-ah hian MHIP Gen.Hqs hruaitute chuan an President hoin nimin khan Chief Minister's Relief Fund-ah Rs. 30,000 an pe a; Covid-19 léng vanga ramria duty-te zinga chhan hrang hrang vanga thi mi pathum - Carolyn Lalvenchhungi, Sangau, Nelson K Beizachhi, Khopai leh Lalpianvula, Zawlnuam Bawrai-te hnenah ràlna Rs. 10,000 ṭheuh an pek bakah, June 29, 2020-a Tuikhurhlua in kâng neitu Vanlalthlana hnenah Rs. 5,000 an pe bawk.

MHIP president Lalthlamuani chuan thuchah tichhuakin, MHIP member-te duhsakna a hlân.

Lalthlamuani chuan, Covid-19 hripui lêng vanga ramin harsatna a tawh mek chu manganthlak tak a nih thu sawiin, MHIP Day pawh a huhoa hman theih a nih loh thu a sawi a; chuti chung chuan mahni hmun ṭheuh­ah a remchan dan anga an khua/veng­ah task force-te nen inráwn chunga a theih ang angin ṭanpui mamawhte pui turin a chah. MHIP sub-headquarters, block, joint leh branch tam takin coronavirus laka Mizoram a him theih nana tlawmngaia ramria riak lutte hnenah ṭanpuina leh thilpek tam tak MHIP-in an pe chu lawmawm a tih thu a sawi a, "Kan motto ''Mite ṭanpui' tih a tak ngeia tihlawhtlingtu in nih avangin ka chhuang em em che u a ni," a ti.

MHIP President chuan, ram hruai­tu te, damlo leh a enkawltu te, rim taka ramri vengtute tan leh Covid-19 vanga thawktu zawng zawngte tan ṭhahnemngai taka ṭawngṭai zel turin MHIP member-te a chah. MHIP hi July 6, 1974-a din a ni a, tunah hian sub-headquarters 10, block 23, joint 21 leh branch zawng zawng 732 a awm mek a, member ṭhahnem tak an awm a ni.