Eptu party ṭhalaite'n kawng chhia an tlawh

Congress party ṭhalaite chuan nimin khan NH-54, Kawnpui leh Kolasib inkara kawngpui chhe laite an tlawh a, Zoram Peoples' Movement (ZPM) Ṭhalai hruaitute'n Buichali lei bul vela NH-54 kawngpui chhe laite an tlawh bawk. Mizoram mamawh chi hrang hrang lâk luhna kawngpui ber lirthei tana tlân harsa khawpa a chhia chu pawi an tih thu an tarlang.

Mizoram Pradesh Youth Congress Committee (MPYCC) chuan, Kawnpui leh Kolasib inkar kawng chu siam hun laiin sorkarin a ngaihthah avangin bungraw phur tana kal hleih theih loh khawpa chhia a awm tih an sawi a, "Heti taka kawng a chhe chung hian mumal taka siamṭhat tuma hmalakna kan hmu lo," an ti.

June 21, 2019-a Assembly session-ah MNF MLA Zothantluanga'n resolution pu lutin, 'MNF ministry-in hun rei lo te chhunga Zoram dung leh vânga kawng chhe tak a siamṭha mai hi lawmawm kan ti,' tih chu pass a ni tih sawiin, "Zoram dung leh vânga kawng chhe siamṭha titute hian kawng hi an hmu lo em ni?" an ti a; NH-54 kawngpui chu Thingdawl velah lirthei tlân hleih theih loh khawpa a chhiat thu an tarlang.

MPYCC tarlan danin, kawngpui chhia bul hnaia awmte chuan kawngpui chhiat chhan chu sorkar inthlahdah vang a ni a, lockdown vanga lirthei tlân a awm mumal loh chhung zawngin kawng siam a nih loh thu MPYCC hruaitute an hrilh.

Congress ṭhalaite chuan, Kawnpui-Vairengte inkar kawngpui siamṭhatna turin sorkarin sum sanction a nei em, sum allocation a awm em, tihte PWD enkawltu chief minister Zoramthanga an zawt a; an zawhna chu mipui hmaa puangzar ngei turin an phût a ni.

ZPM Ṭhalai president Malsawmzuala chuan, tuna kawngpui chhe lutuk hmun chu October 14, 2019-ah pawh a chhiat lutuk avangin an tlawh tawh tih sawiin, "Mizoram mipui tana châk lâkna kawngpui pawimawh bera ngaih theih kum tin mai truck-in an zawh ṭhat ngam loh khawpa a chhe ta ziah mai hi pawi kan ti hle," a ti.

Nikum October thlaa an tlawh ṭum pawhin kawngpui chhe lutuk vanga truck tángte chu excavator hmanga hnuh chhuah ṭhin a nih thu sawiin Malsawmzuala chuan, "Kuminah pawh zin veivâk leh bungraw phurte tan harsatna ngai bawk a thleng leh hi pawi kan ti hle a ni. Hei hian MNF ministry-in mipui ei leh bâr châwk luhna kawng pawimawh a ngaihthahzia a tilang chiang hle," a ti a; kawngpui siamṭha thuai turin sorkar an phût tih a sawi.

ZPM Ṭhalai President chuan, Covid-19 vangin ram pum a buai mek tih sawiin, "Chutih laia party worker-te induhsakna avangin Sports department lamah mipuiin kan chhawr ṭangkai teh chiam tur ni loah restricted tender hmanga hna an inpek laia kan national highway, mipui châk lâkna ber ngaihthah a ni hi a pawi kan ti a, sorkar hi kawng siamṭha tura hma la thuai turin kan ngen a ni," a ti.