Harh tharna kan chang mek - Lal Thanhawla

Congress party president Lal Thanhawla chuan nimina Lal Thanhawla Auditorium-a an party chhung inkhawmah thu sawiin, tunlai hian an party-in harh tharna an chang mek niin a sawi.

Mizoram Pradesh Congress Committee (MPCC) President chuan, "Sorkar leh tur kan ni a, kan sorkar leh loh theihna chu keimahniah buaina a awm a ni. Buaina kan nei lo," a ti.

Lal Thanhawla chuan, tun ang hunah chuan party dang an phûr hle tawh tura a ngaih thu sawiin, "Kan party kan phûr daih zawk hi ngati nge ni ang aw tih ka ngaihtuah ṭhin," a ti a; an party-ah harh tharna a thleng mek niin a sawi.

Tunlaiin an party-ah boruak a awm deuh nia sawi a hria thu sawiin Hawla chuan, "Lo luh tumte tan pawh tîm âwm tak a ni. Chutih laia lawm luh tur an awm reng hian sorkar leh tura buatsaih kan ni tih a tichiang. Eng harhna nge kan chan ka hre phak lo," a ti.

MPCC President chuan, party mite chu party dangin an sàwm pawha chháng lo tura chahin, "Tumah inrîmtir suh u. Keini pawhin Pu Lalduhoma leh Pu Thangtea kan rîm kan rîm loh hi," a ti a; BJP hotu lawkte'n an rim ṭumin Congress ni chunga thih a tum thu a sawi avangin an reh zui niin a sawi.

Congress party-ah thil van­duaithlak tak a thleng nia sawi a awm thu sawiin MPCC President, "Harh tharna atan kan hmang daih. Mi thar kan neih beih zel. Thil vanduaithlak anga lang hi kan harh tharna a ni," a ti.

MPCC vice president thar CL Ruala pawhin thu sawiin, Pathian leh mipui zarah mawhphurhna hrang hrang a chelh ṭhin thu a sawi a, "Kan tunlai boruak thlir hian, tih tak zeta hmalak a ṭul," a ti a; party vice president a nih tâk avangin a kal zelna turah an party mite ṭawiawmna a ngen a ni.