MYC Young Achievers Award sem a ni

22nd September, 2018

Mizoram Youth Commission (MYC) chuan nimin khan Young Achievers Award an sem a, Finance minister Lalsawta khuallian a ni. Award hi ṭhalai, kum 40 hnuai lam mi pariatin an dawng.

Pachhunga University College (PUC) auditorium-a hun hmanah hian Finance Minister chuan, MYC-in an chairman Joseph Lalhimpuia hmalaknaa ṭhalai hlawhtling, entawn tlakte hnenah chawimawina an hlan chu lawmawm a tih thu leh award dawngtute a lawmpui thu a sawi a, "Pathianin Mizo hnam hi hnam dang aia hniam bik lo turin min siam a, keimahnia theihna leh thiamna a dahte hi taimakna leh tumruhna nena kan beih zel chuan chumi hmang chuan Mizote'n khawvel kan la hneh ngei dawn a ni," a ti.

Lalsawta chuan, Young Achievers Award dawngtute chanchin a hriatin, Mizo ṭhalai tumruhte avangin Japanese, American, English leh Korean ṭhalaite nen khawvel tual khatah an léng ta nia a hriat thu a sawi a, "Pu Rokunga'n 'Râltiang i kai ve ang' a tiha raltiang ram chu kan kai ta a ni ber," a ti a; award dawngtute hmangin Rokunga râltiang chu Mizote'n an kai ta nia a hriat thu a sawi.

Inlawmna thu sawitu Joseph Lalhimpuia, MYC chairman chuan, Young Achievers Award an buatsaih chu ṭhalai chawimawi tlakte chawimawi nan leh Mizo ṭhalai dangte cho phûrna atan a nih thu a sawi a; MYC chu Mizo ṭhalaite tan a ding zel dawn a, kawng hrang hranga hma an sawn theih nan hna an thawk zel dawn tih a sawi bawk.

Young Achievers Award dawngtute
1. Alinery Lalngilneii Lianhlawng, Sangau: A pa - L. Hmunlal (L); a nu - C Lalengmawii. Pawl 1-9 chu Sangau-ah a zir a, pawl 12 a pass hnuah Asian University for Women, Chittagong-ah a zir a, tunah University of Sussex, UK-a M.Sc. (MBA) a zir mek. Zirlai ni chungin Sangau-ah library a din a, naupangte tan lehkhabu bakah, computer/laptop-te a chhawpsak. NGO pakhat, 'Rochun: Pay it Forward (for Education) a din.
2. Dr Benjamin Lalfakmawia, Chhingchhip: A pa - Biakdika, a nu - Ramliani. HSLC 2010-ah pakhatna a ni a, King George Medical College and University, Lucknow-a MBBS a zawh hnuah kum 2018-a NEET PG entrance-ah pakhatna a ni. AIIMS-ah PG (Medicine) a zir mek.
3. Dr Krista Roluahpuia, IIT Bombay: Mualbu (L)-ah a piang, a pa - K Lianmawia, a nu - Lalchuailovi. Kum 2009-a B.Sc. a zawh hnuah IIT-Bombay a zawm a, Integrated Ph.D a zir mek. IIT-Bombay ah hian research scholar dangte hriat hlawh khawpa thiam a ni a, khawvela hmanraw váng leh changkang Molecular beam Epitaxy leh High Resolution TEM khawih thei tlemte zingah telin, an hotu zinga mi a ni. August 8, 2018-ah doctorate degree a hmu.
4. H Lalengmawia, Cherhlun: November 2, 1984-ah a piang; a pa - H Hrangchhuma, a nu - Thangrimawii. A ṭul angin a inhlawh ṭhin a, kum 2006-ah desktop publishing a buaipui ṭan a, ar leh vawk a vulh pah bawk. Kum 2010 aṭangin ran vulhna farm a siam ṭan a, a hlawhtling chho hle a, vawk 140 chuang a vulh mek a, chugn zingah chuan vawkpui eng emaw zat a tel.
5. Joan Laldinpuii, Lunglei Salem Veng: March 24, 1998-ah a piang; a pa - Lalhmangaiha, a nu - PC Lalhnehthangi. Kum 2006-ah a ṭhiante nen an infiamnaa a tluk aṭangin kein a kal thei lo a, wheelchair a hmang. Taksa lama harsatna lian tak nei a ni chungin tumruhna nen lehkha a zir zel a, Lunglei College aṭangin kumin 2018-a MZU B.Sc. result chhuakah Mathematics-ah pakhatna a ni.
6. Lalchhuanzela, North Chawnpui: October 14, 1994-ah a piang; a pa - Lalengzauva, a nu - Lalzamliani. An khuaah pawl 7 a zawh hnuah rethei tak chungin Aizawla zir zawm turin a kal, kum 13 a nihiin amahin in a luah ṭan. College a zir chhungin senso zawng zawng a intum a, B.Sc. ṭha taka a zawh hnuah Gujarat-ah Master of Petroleum Geology a zir a, kum 2018-ah zoin, Mizo zinga a hmasa ber a ni. Gujarat State Petroleum Corporation-ah a thawk mek.
7. Lalremsiami, Kolasib: March 30, 2000-ah a piang; a pa - Lalthansanga Zote. Hockey-ah Indian national team player a ni a, kum 2018-a Women Hockey World Cup-ah semifinal an thleng a, Asian Games-ah silver medal an dawng. A hmain inelna hrang hrangah an champion tawh bawk. Mizo zinga Asian Games medal la thei hmasa ber a ni.
8. Lalzemawia, Serchhip Dinthar: December 6, 1978-ah a piang; a pa - Vanlalsawma, a nu - Lalvuli. Chhungkaw rethei tak aṭanga chawr chhuak a ni a, zirna lamah pawl 7 a pass a, a zir zawm lo. Kum 1997-ah Zawlpui (Mat kam)-ah mi ram hawhin nûl a siam a, zikhlum leh anṭamte a chíng a, a hlawhtling chho hle. Rim taka hna thawkin, a kut hnathawh
aṭanga a dehchhuah hmangin in leh lo ṭha tak a din a, motor-te a lei thei tawh bawk.