Thi leh piang chhinchhiah dan sawiho
Inter-Departmental Coordination Committee (IDCC) on Civil Registration of Birth and Death chu nimin khan Secretariat conference hall-ah an ṭhukhawm a; Economics & Statistics director Lalchhuanawma Hrahsel-in a kaihruai.
Meeting-ah hian agenda pasarih chhawp a ni a; a hun taka inziak lut lo, tlai khaw hnua birth certificate leh death certificate dil thar lehte hnena non-availability certificate pek chhuah chungchangah, inbumna leh thuneitute hnena diklo taka certificate lak chhuah tumte an awm ṭhin avangin a inven dan tur an sawiho.
Deatch certificate chu a bikin, ro khâwm leh pension lakna atan a pawimawh avangin certificate lak chhuah diltute lakah fimkhur lehzuala thil kalpui a ṭul nia hriain meeting chuan, mitthi tawhte chhung hnai ngei an nihzia tilang thei turin tih dan phung pangngaia an phût ṭhin piah lamah finfiahna document ṭha tâwk tak phût zel ni se, an ti.
Birth certificate mumal taka nei si, office register-a hming lang si lo chinfel dan tur chungchang; hming thlak duhte lakah finfiahna (documentary proof) pawm tur chin; kum 60 chung lamte mahni ngei kal kher ngai loa ngaihnathiam chungchang; birth certificate leh death certificate print chhuah nan lehkhapuan ṭha zawk hman chungchang leh, certificate lem nia ngaih vawi tam tak department-a complaint lut tawh ṭhinte sawiho a ni bawk.