Aizawlah International Short Films Festival

I&PR Department leh Innovations India-in an buatsaih, Mizoram International Short Films Festival chu September 20, Ningani zan khan Aijal Club-ah neih a ni a, chief minister Lal Thanhawla'n a hawng.

Bollywood star Gulshan Grover chu he hun hmang tur hian a lo kal a ni.

Chief Minister chuan, Mizo­ramin film festival a huaihawt ṭhin chu lawmawm a tih thu sawiin, "Ram hrang hmun hranga chengte kan nun dan kan inzirsak tawnna leh inpumkhatna hmanraw ṭha tak a ni. Film siam hi talent pho chhuahna ṭha tak a ni a; Mizo zingah state páwna kal a, mahni inzirna hun nei an tlem hle chungin talent ṭha tak tak nei inzirmi filmmaker an awm hi a lawmawm hle a ni," a ti.

Film Festival chu Mizo zinga film siam lama tui mite leh mithiamte tan in­zirna hun a nih thu sawiin Lal Thanhawla chuan, "An hma hun zel atan remchanna ṭha tak a thlen ngei ka ring," a ti a; Festival chuan inpumkhatna a thlen ngei a beisei thu a sawi.

Festival-a inelnaah India ram chhung chauh ni lo, khawvel hmun hrang hrang aṭangin film 82 a lut a, chu'ng zinga 25 chu Mizo kut chhuak a ni a; vawiinah khar a ni ang.