A thlawna sum semin dinchhuahna a thlen lo - PL Liandinga

Ṭangrual pawl Zoram People’s Movement (ZPM) adviser PL Lian­dinga chuan Nimina ZPM chhung inkhawmah thu sawiin, a thlawna sum semin dinchhuahna a thlen loh thu a sawi.

PL Liandinga chuan, "A thlawna sem hian dinchhuahna tak tak min thlen lo a ni tih a chian tawh tehlul nen, kan khingpuite hi chuan a thlawna sem an la aupui ta fan a. ZPM hian sorkarna changin pawisa hi kan sawi chhuak ur ur lo mai thei, mahse, kan neih chhun ṭangkai zawka hman kan tum a ni," a ti.

Rinawmna leh dikna nena sum hman chu ZPM tum a nih thu sawiin PL Liandinga chuan, "Hei ringawt pawh hian Mizoram a chawi kâng dawn. Lei loh tur motor-te hi kan lei lo ngam ang. Thingtlang mite thlai thar kan leisak ang a, an ding chhuak ang,” a ti. Mizoram inthlanpui awm turah ZPM-in beiseina sang tak an neih thu sawiin, "A rûka min vote tur an tam kan ring. Sum faia lei ngai voter-te hi tlinna tham an ni lo, veng tinah mi îtawm loh ber berte an ni,” a ti bawk.