BSF pangain Covid-19 an vei belh Pakhatin dawrah thil a lei tih finfiah
Lunglei bul Vànhnè-a BSF transit camp, Covid-19 vanga quarantine centre anga an hman meka awm Border Security Force (BSF) sipai pangain Covid-19 hripui an vei tih July 5, Pathianni zan khan finfiah a ni. Mi panga zinga pakhat chu Lunglei Bazar Vengah thil leiin a kal tih finfiah a ni bawk. Vànhnè transit camp-a awm BSF mi pahnih dangin Covid-19 an vei tih July 4 khan finfiah a lo ni tawh a, an pahniha chetvelna pawh hriat a ni tawh.
Vànhnè transit camp-a awm mek BSF 131 battalion sipai pahnih chu July 3, 2020 khan Lunglei Civil Hospital-ah inentir an tum a, LCH laboratory-a TrueNAT khawl hmangin an swab sample endik nghal niin, July 4 khan Covid-19 an vei tih puan a ni. Hei vang hian Vànhnè-a BSF sipai awm zawng zawng chu nimin khan an awmna hmunah an swab sample lak a ni a, TrueNAT hmanga enfiahnaah an zinga panga chuan hripui an vei tih hmuh chhuah a ni.
Lunglei police hotute hnen aṭanga Vanglaini thu dawn danin, Covid-19 vei hmuh chhuah thar mi panga zinga pali chu July 3-a Covid-19 an vei tih hmuh chhuah tawhte nena Dolcherra, Assam-a ni 14 an inkhung hnua Mizoram rawn lut ho an ni a, pakhat erawh chu chaw chhûmtu a ni.
Chaw chhûmtu hian tun hnaiah Lunglei Bazar Venga dawr pakhatah thil a lei tih finfiah a ni a, hei vang hian dawr neitute chhungkua chu khung hran nghal an ni. Sipai pali erawh chuan an transit camp an chhuahsan lo. Hetih lai hian, July 3-a Covid-19 vei hmuh chhuah BSF sipai pahnihte'n transit camp awmte bakah mi dang an kai chhàwn theih tura ngaihte pawh police leh Health department mite'n an chhui zui a, an zo thawkhat tawh a ni.
BSF sipai pahnihte chêtvelna
• Dolchhera-ah June 14-23, 2020 chhung an awm a, hmun dangah an chhuak lo.
• June 24 zanah Tuirial thlengin, an riak a, hmun dangah an chhuak lo. July 25 zing dar 8-ah Vanhne, Lunglei lam panin an chhuak.
• Vànhnè an thlen hnuah an inkhung char char a, hmun dangah an chhuak lo.
• BSF rawn chho mi 21 zinga pahnih chu an hritlàn avangin July 3-ah Lunglei Civil Hospital-ah inentir turin an kal. LCH-a an awm laiin canteen-ah thingpui an in a, chutih lai chuan customer dang an awm lo. Canteen nghaktu chu July 3 aṭanga ni nga hnuah swab sample lak tura tih a ni.
• Sipaite hian LCH pan nan BSF 407 an hmang. Driver leh damlo pahnih an chuang a, damlote chu a hnungah chuangin, an in-
ṭhut pawlh lo.
• LCH aṭanga Vànhnè an pan leh lamah driver-in sangha a lei a, sangha zuartu hriat a ni tawh. Sangha zuartu chu driver sample result azirin swab sample lâk ve tur tih a ni a, páwna chhuak lo tura tih a ni.