Rannung thahna hlo hman dan zirho

Agriculture depart­ment leh YMA sub-headquarters Serchhip ṭangkawp chuan nimin khan Serchhip Hmarveng YMA Hall-ah ‘Rannung thahna leh hlo túr hman dan zirhona’ an buatsaih.

Serchhip DAO James Lalsiamliana chuan, rannung thahna leh hlo túr chu lo neitute tan a ṭang­kai thu sawiin, "Chutih rualin, mihring hriselna nghawng thei a ni em tih hi zawhna a tam ta hle. Hemi chungchang sawihona leh zirna hun YMA nena kan nei thei hi a lawmawm hle a ni," a ti a; zirhonaa telte chu mi dang zirtir chhâwngtu ni thei tura inbuatsaih turin a chah.

Serchhip sub-hqrs. YMA president R Sang­hmingthanga chuan, "Ram leh hnam humhalh zel tur leh chîm ral kan nih loh nan hrisel taka kan awm hi a pawimawh. Cancer tamna ber district tia min hriat ṭhin pawh, a tamna ber kan ni lo tih hi kan hmu chhuak tawh a, chutih rual chuan, mi tam takin cancer natna kan la vei mek zel chhan hi hmuh chhuah a nih theih nan hmalak mek zel a ni," a ti.

Zirhonaah hian Agri­culture deputy director C Lalnithanga'n 'Rannung thahna hlo hman dan chungchang' leh 'Hlo túr hman dan chungchang' tih thupui a sawi.

Serchhip sub-head­quarters YMA hnuaia branch hrang hrang 21 leh sub-headquarters-in direct-a awp YMA branch paruk leh group YMA pathum aiawhte zirhonaah hian an tel a ni.