MNF OB-te inlungrual thu sawi

MNF vice president Dr R Lalthangliana chuan nimin khan Mizo Hnam Runa inkhawmah thu sawiin, MNF party-a elected office bearer pa­nga­te chu kahpathir anga sakhat an nih thu a sawi.

Dr R Lalthangliana chuan, "Party dangte anglo takin MNF chuan leader ṭha kan nei a, vanduaithlak taka Pu Denga'n min boralsan hnuah zu far khat pawh a káa la lut ve lo, zing tin Pathian chibai bûk ṭhin, a CM lai pawha hna thawk ṭha em em, international level-ah pawh mite ngaihsan, Central-ah eng pawh sorkar se hotute'n an rin em em Pu Zoramthanga kan nei hi kan vannei tak zet a, kan chhuang hle a ni," a ti.

R Lalthangliana chuan, "MNF elected office bearer pangate hi kan lungrual em em a, kan inkarah sarâng pan tê leng lo chu sawi loh, kahphathir sakhat ang kan ni," a ti a; mi ṭhenkhatin social media-ah MNF hotute inkarah khî awm anga an sawi ṭhin chu thu dik lo niin a sawi.