Siahatlaah total lockdown

Siaha district-a quarantine facility aṭanga chhuahtir tawh zinga mi pakhat chu Covid-19 a vei tih hmuh chhuah a nih avangin, nimin aṭang khan Siahatla task force chuan tiamchin awm loin total lockdown an puang. 

Siaha aṭanga thu dawn danin, hripui vei hmuh chhuah thar hian June 1, 2020-ah Siaha a thleng a, quarantine facility (Lorraine School)-a first floor-ah dah a ni. A swab sample vawi hnih endikah a negative ve ve avang leh inkhung hran hun tur a awm tlin tawh avangin July 1 khan an in lama fimkhur taka awm zui turin chhuahtir a ni.

Lorrain School quarantine facility-a second floor-a awmte zingah Covid-19 vei mi paruk hmuh chhuah a nih avang leh an intlawhpawha hriat a nih avangin endik nawn leh a ni a, July 4 khan Covid-19 a vei tih hmuh chhuah a ni ta a, DCHC-ah dah nghal a ni. Siahaa Health department chuan, Pathianni khan a kài chhàwn theih tur àwmte an zawng zui nghal bawk. Covid-19 vei hmuh thar chènpuite leh an in hnuai luahtute chu hmanraw inṭâwm nei an nih avangin an vaiin quarantine facility-ah dah nghal an ni a, an ina lêng lut chhungkaw 12 pawh home quarantine-a awmtir nghal an ni. Siahatla hian total lockdown puang mah se, an veng chu Siaha kawtchhuaha awm a nih avangin, khua/veng dang tan lirthei kaltlang an phal a, chawlh leh riah erawh an phal lo.