Sawhthing leh hmunphiah hralhnaah Tax holiday kan puang dawn - Duhoma

Zoram People’s Movement (ZPM) chief ministerial candidate Lal­duhoma chuan, tuna Mizoram mipui, beidawng taka awm mekte chu Mizoram chief minister ni tawh zinga pahnihte tihbeidawn an nih thu a sawi a; ZPM an sorkar chuan sawhthing leh hmunphiah hralhnaah ‘Tax holiday’ an puang dawn thu a sawi bawk.

September 22, Inrin­nia Kawnpui leh Kola­sib-a ZPM office hawnna inkhawmah thu sawiin Lalduhoma chuan, "Mizoram mipui tam zawk kan sorkara beiseina nei loa beidawng mekte hi kan hruaitu pahnihte tihbeidawn a ni," a ti.

Lalduhoma chuan, Brig. T Sailo sawi ṭhin la tihhlawhtlin loh Six Basic Needs chu ZPM a sorkar chuan an tihlawhtling ngei dawn tih sawiin, "Power-a kan intodelh theih nan hydroelectric power leh solar energy ṭang­kawpin Mizoram mamawh power-a intodelhtir ngei kan tum. Kalphung thar - mipui sorkar kan din dâwn a, Congress leh MNF damdawi kan ngeih lo, damdawi thar i ei tawh ang u," a ti a; ZPM sorkarin sawhthing kg. khat Rs. 50 leh hmunphiah kg. khat Rs. 100-a an lei ngei dawn thu a sawi.

ZPM a sorkar chuan ṭhalaite pualin Skill Development Mission an din dawn thu sawi­in Duhoma chuan, "Knowledge partner leh agency rintlak chauh hmangin line hrang hrangah course hrang hrang chhawp chhuakin, ṭhalai sing tél hna hmu turin chher chhuah an ni ang. Skill mapping leh labour mapping siam a ni ang a, block tinah community development skill school/institution dah tum a ni," a ti.

ZPM CM Candidate chuan, Mizoramah mi qualify an awm tâwk loh avangin Mizorama supply leh contract hna liante hnam dang pek an ni ṭhin tih sawiin, "Kan budget tam tak hi hnam dang iptêah lutin ram páwnah a chhuak ṭhin. Ram páwna private hospital pan nana damlote'n sum an sen ral ringawt pawh a tam tham hle. Hengte hi ti ve a, firm leh company-te din ve thei turin kan ṭhalaite chher chhuah kan tum dawn a ni," a ti a; capacity building programme ṭha tak an duan thu a sawi.

Lalduhoma chuan, Mizoram Ceiling on Government Guarantees Act, 2011 chu tihbo an tum thu a sawi a, "A aiah Central scheme awm sa, Credit Guarantors Scheme hman a ni ang," a ti bawk.