Mizoram police-te hman tur silai Sniper rifle 5 leh AK-47 rifle 30 lei thar

Mizoram Police chuan tun hmaa silai an la neih ngai loh sniper rifle panga an lei thar a, pakhat Rs. 8,10,585 man a ni. AK-47 rifle, pakhat Rs. 68,518 man 30 an lei bawk. Silai chi hnih, a vaiin 35 lei nan hian Rs. 61,08,467 an sên a ni.

Police-in sniper rifle an leite hi Brugger & Thommet AG, Thun, Switzerland-a mi a ni a, pakhat lei nan India pawisain Rs. 8,10,585 zel sen niin, panga atan Rs. 40,52,927 sen a ni. Sniper rifle hian September 17, 2018 khan Aizawl a rawn thleng tawh.

Thu dawnnain a sawi danin, Bureau of Police Research and Development, (BPRD), Ministry of Home Affairs-in kaihhruaina a siam ang chuan, Mizoram Police-te chu sniper rifle 80 vel nei tura ngaih an ni a, company tinah pakhat leh police station tinah pakhat nei tur anga chhût a ni. MHA chuan, kum 2009 khan Mizoram sorkar chu commando din turin a ti bawk.

Mizoram sorkar chuan kum 2010 khan 4th. IR leh 5th. IR battalion-ah commando a din a, a din nan hian state sum hman phawt niin, a hnuah sorkar laipuiin a rawn pe leh thung. Kum 2013-14 khan commando-te hmanraw mamawh chi hrang hrang lei zawh a ni. MHA-in commando din tura a tih laiin, Mizoram Police-te chu sniper rifle pathum lei tura tih an ni a, mahse, sniper rifle bik erawh lei a ni lo.

MHA nawrna avangin Mizoram sorkar chuan kum 2017-18 khan NEDP hnuaia sniper rifle leina tur sum a dah a, ram danga mi lei a ngaih avangin sniper rilfe panga leina atan Euro 42,700 sên a ni. Ram dang aṭanga silai la lut tur hian airport-ah international GST an chawi a, a hnuah MHA-ah custom duty âwl an dil a, a tirah MHA-in remti lo mah se, an dil nawn leh hnuah custom duty an chawi tur 30% chu MHA-in àwl a phalsak.

GST chawi hnu leh custom duty àwl hnua sniper rifle panga lei leh lak luhna atana sum sen chu Rs. 40,52,927 a ni a; silai leina man chu March 2018 tàwp lamah pek a ni. Switzerland aṭanga thlawhtheihnaa phurh dilna, sorkar laipuia Directorate General of Civil Aviation-in a phalsak hnuah September 17, 2018 khan Aizawl a lo thleng a ni.

Police-te chuan sniper rifle hmangtu tur an la ti fel lo a, commando-te leh hmun rálṭi deuha duty-te hmantir rin a ni. A hmangtu turte'n training an la nei lâwk lo.

Sniper rifle mu len zawng chu .308Win niin, vawi khat kaha load nawn zel ngai chi (bolt action) a ni a; a sei zawng milimetre 906/1200, a dáwt (barrel) sei zawng milimetre 610, a rih zawng kg. 6.1, a kah thui zawng km. 1 (metre 1,000) a ni.

Police chuan AK-47 rifle, Arsenal company, Bulgaria siam 30 an lei bawk a, India pawisain pakhat Rs. 68,518 man niin, silai 30 atan Rs. 20,55,540 (Euro 25,500) sên a ni. Silai hi NEDP-a sum dah hmanga lei bawk a ni a, he thu ziah lai hian Mizoram a la rawn thleng lo.

Hetih lai hian, a man zawng zawng hlut zawng aṭanga 18% chu GST-ah chawi a la ngai dawn tih Police hotute chuan an sawi.

Mizoram Police chuan, AK-47 rifle 609 an nei sa a; AK-47 an lei thar hi model AR-M1F41 a ni.