District ramri tur sawi chiang turin phût

Congress Legislature Party (CLP) treasurer Zodintluanga, minister chuan, MNF-te'n sorkar­na an chana district pathum tih­hlawhtlin an tiamte chu a ramri tur sawi chiang turin MNF party a phût.

Vaivakawn Congress unit-in September 22, Inrinnia Zohnuai Primary School-a mi thar lawm luh inkhawm an buatsaih a hmanpuinaah thu sawiin Zodin­tluanga chuan, "MNF-te hian an sorkar hmasak khan district pathum an puang a, district pathum tunah hian pek tiam angin an insawi a ni. Pek an tum tak tak a nih chuan, heng district pathum pek an tum ramri hi sawi chiang rawh se," a ti.

Zodintluanga chuan, "District pathum headquarters atan Saitual, Khawzawl leh Hnahthialte hi MNF hian pek an tum a nih chuan, kalpaha vote zawn nan leh mipui buma sorkarna siam tuma sawi liam mai mai loin, a ramri puang ngam rawh se," a ti a; ramri an puan ngam loh chuan MNF-te chuan kalpaha mi bum an tum tihna a nih tur thu a sawi.

Congress hotu ṭhenkhatin an party an chhuahsan chungchang sawiin CLP Treasurer chuan, "Tun hnaia Congress chhuahsantu hotu ṭhenkhatte chhuah chhan chu Congress sorkar a ṭhat loh vang emaw, Congress hotute an ṭhat loh vang emaw, sorkar a corrupt vang ni loin, ram pum huap ni lo bial bil emaw, khaw bil emaw an buaipui vang a ni tih an ziak aṭang khan a chiang reng a ni," a ti.

Zodintluanga chuan, Aizawl West-II ah kum 2008 inthlanah MNF chu party mala dingin pa­thumna an nih thu sawiin, "PC can­didate Brig. T Sailo hneh taka tlingin, kum 2013-ah MNF leh MPC chu thawkhoin, Congress can­didate hnawhsarum taka an dah chu party pahnih thain a hneh ṭâwk chauh a ni," a ti a; Aizawl West-II bialtu MLA ni lai chuan tunah chuan tlin theihna chance a neih tawh lo niin a sawi.