Lunglei-ah mi vit hlum, pakhatin hliam a tuar

Biakdika (18), Lung­lei Farm Veng chuan Sep­tember 22, Inrinni zan dar 7:30 vel khan Lunglei Ramthar Vengah chemtein mi pakhat a vit hlum a, mi dang pakhat a vit hliam bawk. Biakdika hi a tlan­chhiat hnuah Inrinni zan vêk khan an vengah man a ni.

Lunglei aṭanga thu dawn danin, Biakdika'n a vih hlum hi Suithanga (41) s/o C Laldala, Lung­lei Chanmari-III a ni a, a pum leh hnungzángah ṭum eng emaw zat a vit a; a hmunah a thi a ni.

Suithanga a vih hnu­ah Rorelliana s/o Zohmingthanga, Lung­lawn, Lunglei a vit leh bawk a; ani hi Lunglei Civil Hospital-ah enkawl mek niin, a ngaihtuahawm lutuk lo niin an sawi.

Biakdika hi a tlan­chhiat hnuah Lunglei Farm Vengah man a ni a, mipuiin kut an thlak nat hmain YMA hruaitute'n police hnenah an hlan. Biakdika hi zan tìr lamah auto-rickshaw driver-te nen an inhmu thiam lo deuh a; a kal sawn hnuah chemtê nen kal lehin, a hmuh remchante a a vit ta mai niin an sawi. A vihte hi auto-rickshaw driver-te zinga mi an ni lo ve ve tih an sawi bawk.