Co-operative Society-te'n RCS atan Bhupesh Chaudhary an duh lo

Cooperative society hrang hrang intêl khawm, Mizoram State Level Federation Co-ordination (MSLFC) chuan, Mamit DC hlui Bhupesh Chau­dhary, Registrar of Coo­perative Societies (RCS) atana dah a ni chu an duh lo.

MSLFC hruaitute hian September 22, In­rin­ni khan Cooperation minister Vanlalawmpuii Chawngthu chu a chen­na inah an hmu a; Coo­peration registrar atana Bupesh Chaudhary dah an duh loh thu hi an thlen. Hemi chungchang hi Chief Minister hnenah ziakin an thlen bawk.

MSLFC hruaitute chuan, Mizoram NGO Coor­­dination Committee-in an duh loh chu Coope­rative society-te'n an duh bik loh thu an sawi a; Bupesh Chaudhary an duh loh thu chu Joint NGO hruai­tute pawh an sawipui tawh thu Vanglaini an hrilh.

Bhupesh Chaudhary hi September 17, 2018 zana Mamit aṭanga Aizawla hruai a nih a, Central YMA bultuma Aizawla YMA branch hrang hrang hruaitute'n an lo nghah chungchangah CYMA president Vanlal­ruata chuan, Bhupesh Chaudhary chu Mamit aṭang chauh ni loin, Mizoram aṭanga sawn chhuah an phût thu a lo sawi tawh a, "Mamita an duh loh hi Aizawlah pawh kan duh bik lo a, Mizorama awm tlakah kan ngai lo," a ti a; Mizo­ram aṭanga sawn chhuah an phût tih a sawi a ni.

RCS atana Bhupesh Chaudhary dah a nih chungchanga Vanglaini palai zawhna chhangin CYMA President chuan, tunah chuan thu mûm an la neih loh thu a sawi a, "Kan la rel zel turah kan ngai a, boruak kan thlir zel ang," a ti.