AMFU-in Aizawlah kawngzawh an tum

All Mizoram Farmers Union (AMFU) General Headquarters, Aizawl chuan an thil phûtte Mizoram sorkarin a tihhlawh­tlin loh avangin September 28, Zirtawpni ­khian Aizawlah 'Mizoram kut hnathawktute chhanchhuahna kawngzawh' an huaihawt dawn tih an puang.

AMFU hruaitute chuan September 22, Inrinni khan Aizawl Press Club-ah thuthar thehdarhtute kâwmin, September 11-a AMFU Gen.Hqrs. hotute ṭhukhawm chuan, sorkara kan thil phûtte a hlawhtlin ngei theih nan lungawil ohna lantir an rel tih an sawi a; "September 28-ah Aizawlah Mizoram kut hnathawktute chhanchhuahna kawngzawh neih a ni dawn a, he huna lo tel tur hian Mizoram hmun hrang hranga farmer zawng zawngte kan ngenin kan hriattir a ni," an ti.

AMFU statement chuan, agriculture marketing chungchangah vawi tam tak sorkar hotute hnenah rawtna an thlen ṭhin thu sawiin, tun hnai kum li kal ta aṭang khan kut hnathawktute'n sawhthing an hralh theih loh avangin APMC Act / APLM Act 2017 hnuaia regulated market kalpui a ṭul thu CM Lal Thanhawla leh hotu dangte an sawipui tawh thu an sawi.

APMC Act chu kum 2008-ah MNF sorkar laiin pass a nih tawh thu sawiin, AMFU chuan, Rules erawh an siam hman lo tih an sawi a, "CM Lal Thanhawla te nen kan sawiho hnuah CM chuan Commerce & Industries Commissioner chu thla hnih chhunga Rules siam turin a ti a, kan lawm hle. kum a vei hnuah pawh hmalakna hmuh tur mumal vawiin thlengin kan la hre lo," an ti.

Beiseina sang tak nen sorkar hotute hmalakna an thlir a, hmasawnna erawh an hmu lo hle tih sawiin AMFU hruaitute chuan, "Dt. 8.5.2018 khan CM hnenah Land Reform leh Agriculture Marketing System (APMC Act/APML Act of 2017) chungchangah ultimatum thehluh a ni," an ti a; ultimatum-ah chuan August 2018 chhung ngeia APMC Act/APML Act tipuitling ngei turin sorkar an ngen tih an sawi.

AMFU hotute sawi danin, June 27, 2018-ah land reform chungchangah Land Revenue & Settlement (LRS) Secretary office-ah meeting neih a ni a; chutah chuan LRS department lam hotute'n land reform chungchangah sorkarin hma a lak hman tawh dawn loh thu an sawi. Agriculture marketing chung­changah July 18-ah Commerce & Industries Director office-ah meeting an nei leh bawk.

AMFU hruaitute chuan, "Heng kan thil hmuh leh hriat aṭang hian kan rama rorel tura kan thlan ram hruaitute hian ram siam ṭhatna tur leh intodelhna tura hmalak an tum lo a ni tih a lang chiang hlein kan hria," an ti.