Mizoram hmasawn dan tur sawiho

September 21, 2018 khan Mizoram University (MZU) conference hall-ah, ‘One day conference on Strategies for Development of Mizoram’ buatsaih a ni a, Governor Kummanam Rajasekharan-a'n a hawng.

Larsap chuan, Mizoram chu a chhunga chengte hnam zia hrang deuh vang te, a leilung hausakna leh mawinate leh boruak nuam tak avangtein hmasawnna tur tam tak a la neih thu a sawi a, "India hmarchak biala ramte zinga hmasawn ber a ni thei. Food processing industry din chu hmalakna pawimawh tak, mi tam tak tana eizawnna siam theitu a ni," a ti.

Sorkar laipui pawhin Mizoram chu India Bamboo Capital-a siam a duh thu sawiin Governor chuan, "Chu hmalakna tihlawhtling tura vawiina kal khawmte thiamna leh thlawpna a ngai. Mizoram chuan sorkar laipuia scheme chi hrang hrangte a la chhawr ṭangkai tâwk lo," a ti a; scheme-te chhawr ṭang­kai turin ruahmanna mumal tak siam a pawimawh thu a sawi.

Higher & Technical Education secretary Ashish Kundra pawhin thu sawiin, zirna lama mithiamte leh sorkar inkara thawhhona chu hmalakna duhawm tak a nih thu a sawi a, "Ṭhalaite tana eizawnna siam chu sorkar tan pawha chona lian tak a ni. Eizawnna siam a nih chuan eng hna pawh thawh an hreh lo," a ti.

Planning secretary Dr C Vanlalramsanga chuan, "Development strategy chuan market, sorkar leh vantlangte rualkhai taka chawikan a tum tur a ni," a ti a; ram hmasawn atan hmalakna tur chi hrang hrang awm mah se, a tahtawla an pawimawh dan azira hmalak a ṭul thu a sawi bawk.