Lungleiah election chungchang zirna buatsaih

Election Commission of India flagship programme Systematic Voters’ Education and Electoral Participation (SVEEP) chu Lunglei district huam chhungah ngawrh taka kalpui mek zel a ni a, he hmalakna kal zelah tun hnai khan Convention Centre-ah zirlaite leh tlawmngai pawl hrang hrang tetan election chung­chang inzirtirna hun ‘Electoral Literacy for Young Voters & NGO’s’ program buatsaih a ni.

Training kaihruai­tu DC Dr. Ankita Chak­ravarty chuan India khua leh tui vote nei thei chinte chuan vote thlak kan ngaih pawimawh a ṭul thu sawiin, "India ram State hrang hrang dinhmun enin vote thlak percentage a sang lutuk lo ṭhin a, hetih laiin Mizoramah erawh 80% vel vote thlak an awm ṭhin hi thil lawmawm tak a nih rualin, tun aia tam zawkin vote kan thlak zel theihna turin vote thlak kan ngaih pawimawh thar zel a pawimawh," a ti.

Thusawitu dang, Lunglei District MJA fin. secretary Lianchama Chhangte chuan SVEEP chungchang pawimawhna sawiin, "India khua leh tui kum 18 tling chin, mi tam zawkin vote an thlak theihna tura inhrilhriatna a ni. India khua leh tui vote nei thei chin kan nih chuan vote thlak hi kan dikna chanvo leh kan mawhphurhna pawimawh tak a ni," a ti a, vote thlak loh mai mai chin loh tur a nih thu a sawi

He hunah hian ‘Voting for All’ tih thupui­a hmangin extempore speech hmanga intihsiakna neih a ni a, pakhatna - Lalremliana Chhakchhuak, HATIM; pa­hnihna - B. Lallawmzuala, Govt. Leitlangpui HSS leh pathumna - F Laltanpuia, Govt. J. Buan­a College te an ni.

SVEEP hi mi puitling vote nei thei chin India khua leh tui dik tak ten vote neih hlutna an hriat thar lehzualna tur leh vote thlak pawimawhna leh vote thlak ngei tura dan in min phut thu te inzirtirna a ni. Lunglei District SVEEP hmalakna hnuai­ah hian Slogan Writing Competition leh Painting Competition te buatsaih tawh niinrally pawh buatsaih tum a ni.

District Level Master Trainer-te kaihhruaina hnuaiah EVM leh VVPAT hmelhriatna ‘Awareness Campaign’ ngawrh taka kalpui mek niin NGO, zirlaite leh mipui ṭha­hnem tak hnenah awareness pek mek zel an ni.

Lunglei district huam­chhunga assembly constituency zawng zawng tlawh chhuak turin September 7khan Mobile Polling Station Van 14 vailiam an ni a, hengte hian khaw hrang hrang tlawh chhuakin SVEEP Awareness Campaign an kalpui mek zel a ni.