KHAWTHLIR

Nimin khan Zoram Medical College (ZMC) Covid-19 Laboratory-ah swab sample 50 vel endik a ni a, he thu ziah lai hian result a la chhuak lo. Sample endikte hi State Referral Hospital bakah, Aizawl, Champhai leh Serchhip district aṭanga an dawnte a ni.

YMA, Phulpui Branch chuan thuchhuah siamin, Covid-19 hri léng vanga khawtlang mipui an him theih nan Zawlpala Thlàntlang chu tlawh theih loha khar chhunzawm zel a nih thu an tarlang a; tlawh duh leh tlawh tumte hriatthiamna an ngen. Phulpui YMA chuan, Zawlpala Thlàntlang tlawh ṭhinte chungah lawmthu an sawi tih tarlangin, "Ṭhian ho, chhungkua, páwl leh mimalte'n he hmun nuam tak hi min rawn hmuhpuiin, khuanu duan boruak nuam tak min rawn chhimpuitu an pung zel hi lawmawm kan ti hle a ni," an ti.

BJP, Mizoram Pradesh chuan nimin khan an pisaah Bharat Jan Sangh (BJP hming hmasa) dintu Dr Syama Prasad Mukerjee pian champha vawi 119-na pualin hun an hmang a, an president Vanlalhmuaka'n thu a sawi. SP Mukerjee hi July 6, 1901-ah Calcutta-ah a piang a, India rama mithiam hmasate zinga mi a ni. October 21, 1951-ah Bharat Jan Sangh party dinin, president hmasa ber a ni a, kum 1952-ah MP-ah thlan a ni.

Covid-19 Task Group on Migrant Workers & Stranded Travellers chhinchhiah danin, Covid-19 léng leh inkhàrkhip vanga state páwna tangkhang Mizorama rawn haw tur July 5 thleng khan mi 1,512 an la awm. Tangkhang rawn haw tawh zat chu mi 12,889 an ni a, mi 112 chu kawng lakah an thang mek. 

Synod moderator Rev. R Lalchangliana lehkhabu ziah 'Van Kanan Pantute Tan' tih chu nimin khan Lloyd Hall, Synod Office-ah Synod sr. executive secretary Rev. Lianhmingthanga Sailo-in a tlangzarh. Lehkhabu hi Synod Bookroom leh a ziaktu hnenah lei theih a ni a, Rs. 100 man a ni.

Kolasib District Border Safety Monitoring Team leh YMA Sub-Headquarters, Kolasib ruahmannaa ramri depa duty tur Saidan Branch YMA aṭanga volunteer mi 19-te chu nimin khan Kolasib DC pisa tual aṭanga vailiam an ni. Saidan Branch YMA member-te hi July 13 thleng Phaisenah ramri vengin an duty ang.

State Referral Hospital (SRH)-ah Covid-19 vei mi 22 enkawl mek a ni a, Isolation Ward-ah an awm. Mi 22-te hi mipa 15 leh hmeichhia pasarih, Aizawl district mi 21 leh Lunglei district mi pakhat niin, kum 3-56 inkar an ni a, taksaa harsatna lian nei an awm lo. SRH-ah hian hripui vei rinhlelh thilah nimin khan mi pathum dah luh thar an ni a, an zinga pakhat chu ramri vénga duty ṭhin, Champhai aṭanga dah luh niin, ICU-ah enkawl a ni.

Lunglei DC V Lalsang­liana chuan, Vanhne-a BSF transit camp-a awm BSF zingah Co­vid-19 vei hmuh chhuah an awm avangin BSF Base Camp chheh­vel chu tlawhpawh phal loh (containment area) atan a puang. Containment area huam chin chu - BSF camp aṭangin chhim lamah District Jail pan chhohna kawng péng, hmar lamah Vanhne khaw dai (Vanhne leh BSF camp inkar), tlâk lamah Bethel Center leh, chhuah lamah BSF camp 

aṭanga meter 100 chin a ni.