Mizoram Film Festival khâr a ni

I&PR department leh Innovations India-in September 20, 2018 zan aṭanga Mizoram Inter­na­tional Short Film Fes­tival (MISFF) an buat­saih chu Inrinni zan khan khâr a ni a, khâr­na inkhawm chu Gover­nor Kummanam Rajase­kharan-a'n a hmanpui.

Larsap chuan, film chu khawtlang tana hmanraw pawimawh tak, zirtirna ṭha min petu leh khaw­tlang siamṭha tura ngaihtuahna thar neihtir ṭhintu a nih thu sawiin, "Mizote hi an themthiam a, hnam zia pholang thei thilte nen pawh inzawmna thui tak an nei a ni. Mizoram hi leilung film siamtute hîp thei tur khawpa a mawi a ni," a ti.

Mizoram chu film siam­tute fuan khawmna hmun ni thei se a duh thu a sawiin Governor chuan, "Festival-a Mizo kutchhuak film 25 lai a lut hi a lawmawm hle. Hetiang festival hi Mizoram hmun hrang hrangah pawh buatsaih theih ni se," a ti a; Film Festival chuan Mizo film siamtute a tihphûr lehzual a beisei thu a sawi.

MISFF curator, Capt. Rahul Bali chuan, sorkar thlawpna avangin Film Festival chu hlawhtling a nih thu a sawi a, "Festival hi short film festival kan buatsaih hmasak ber ni mah se, khawvel hmun hrang hrang aṭang leh Mizo kutchhuak ngei film 25 a lo lut hi kan beisei phak bak a ni," a ti.