Mizoramah Covid-19 vei Mi 191 hmu chhuak tawh
July 5, Pathianni khan Lunglei Civil Hospital (LCH) laboratory-ah TrueNAT kháwl hmangin Covid-19 hripui vei mi panga hmuh chhuah a ni a, heti hian hripui vei hmuh chhuah tawh zawng zawng chu mi 191 an ni.
LCH laboratory-ah hian Pathianni khan mi 25-te swab sample endik zinga mi pangain hripui an vei tih hmuh chhuah a ni a; an vai hian BSF mi leh sate niin, Vànhnê khuaa quarantine centre atana an hmana awm an ni. Kum 27-52 inkar mite niin, Kerala, Madhya Pradesh, Assam leh Shillong aṭanga tun hnaia rawn lêtte an ni a, taksaa harsatna nei (symptom nei) an awm lo.
Heti hian Mizoramah Covid-19 vei mi 191 hmuh chhuah an ni tawh a, chu'ng zinga mi 139 chuan an vei tawh lo (negative tawh) a, mi 52-in an vei mek. Hripui vei tawh zat aṭanga la vei mek zat hi 27.23% a ni a, negative leh tawh zat chu 72.77% a ni. Vei tawh lo mi 139 zinga 133 chu an chhuak tawh a, mi paruk (Mamit district mi vek) chu Dedicated Covid Health Centre (DCHC)-ah an la awm mek.