Agri. Minister-in MASA conference hmanpui

Mizoram Agriculture Service Association (MASA) chuan nimin khan Tourist Complex, Berawtlangah General Conference vawi 7-na an hmang a, Agriculture minister Lalrinsanga khuallian niin, Agriculture Development Board chairman H Biakzaua, MLA chu khualzahawm a ni.

Minister Lalrinsanga chuan, Agriculture department-in kum 2019 chhunga hlawhtlinna a neihte lawmawm a tih thu sawiin, "Kum 2020-ah pawh hlawhtlinna duhawm tak hmuh ngei ka beisei. Kum kal taa kan hlawhtlinna chu kum thar atana bul ṭanna tur a ni," a ti. Fall Armyworm vangin nikumah loneitute'n harsatna an tawh thu sawiin, kuminah harsatna a thleng leh dawna sawi a nih avangin lo inpuahchah lâwk a pawimawh thu a sawi.

Agriculture Minister chuan, Mizoram páwn aṭanga lâk luh - dâl, purûn, alu leh télte chu Mizoramin a thar ve theih a nih thu sawiin, "Intodelh ve thei kan nih angin Agriculture mi thiamte'n theihtawp chhuah a hun tawh," a ti a, mipui tana thawk an ni tih inhre thar turin a chah.