Ni 7 chhung Thenzawlah total lockdown Mi 12 swab sample endik tura lâk a ni

Covid-19 vei tih finfiah mi pahnih, Lawngtlai district lam mite Jon Jon Restaurant, Thenzawlah an chawlh avangin Serchhip DC Kumar Abhishek chuan vawiin aṭanga July 13 thleng Thenzawlah total lockdown a puang. He thil thleng vang hian Thenzawl mi 12-te swab sample lak a ni a, he thuziah lai hian endikna result kan hre hman lo.

Serchhip DC-in total lockdown a puan hma hian July 5, Pathianni zana Thenzawl Town Task Force Committee ṭhukhawm chuan khauh zawka inkhàrkhip an lo rél tawh a, an ṭhutkhawm zawh aṭangin an kengkawh nghal.

Thenzawl task force meeting chuan, "Mipui tithlabár a, mi tam tak dinhmun derthâwnga dahtu, quarantine tur an nih inhre sa chunga fimkhur lo taka mipui zinga khawsate'n dan anga hremna an hmuh theih nan FIR thehluh ni se," an ti. He thu ziah lai thleng chuan FIR an thehlut lo.

Thenzawla Vantawng editor Liantluanga Renthlei hnen aṭanga thu dawn danin, total lockdown vang hian Thenzawlah lirthei chêt chhuah phal a ni lo a, pisa leh dawrte khâr vek a ni. Mipui páwnchhuah khap a ni a, hna laklawh neite pawh engmah chhunzawm phal a ni lo a, mipuiin thu an zâwm ṭha hle. Aizawl-Thenzawl-Lunglei kawngpuiah erawh chuan khualzin leh bungraw phur lirtheite tlân tlang phal a ni.

Jon Jon Restaurant neitute leh thawktu te, an ṭhenawm hnaite leh Covid-19 veite thil leina neitu te, an vaiin mi 12-te swab sample chu July 5, Pathianni zan khan lâk nghal a ni a, nimin khan an endik nghal tura thawn a ni.

Serchhip DC Kumar Abhishek hoin nimin khan a pisaah district-a sorkar official-te leh Thenzawl Town Task Force Committee hruaitute an ṭhukhawm a, hmalak dan tur an sawiho. Thenzawl TTFC-in tiam chin awm loin total lockdown puang mah se, Serchhip DC chuan July 7-13 chhung atan total lockdown a puang ve leh a ni.

Total lockdown hian magistrate, Health department, Police, Fire & Emergency Services, official duty, media, bawnghnute sem leh SDO(C) aṭanga phalna neite a huam lo.

Thenzawla total lockdown dan tur :

    Phalna nei loin tuman an chenna in an chhuahsan tur a ni lo.

    Sumdawnna hmun leh dawr zawng zawng khar vek tur a ni.

    Thenzawl town chhungah lirthei eng chi mah chhuahvah phal a ni lo.

    Thenzawl paltlang tur lirtheite chu chawl khawmuang loin an tlan tlang thei ang.