CB Piggery-ah vawk 450 chuang vulh
CB Piggery, Lengte-ah vawk 450 vel vulh mek a ni a, no nei mek leh rai lai eng emaw zat an awm. Piggery hi CB Lailiankhuma ta niin, kum 2015 aṭangin Sihhmuiah bul a ṭan a, kum 2018-ah Lengte ramah a inbun thar a ni.
Vanglaini palai zawhna chhangin CB Lailiankhuma chuan vawk a vulh chhan a sawi a, "Mizote'n sa kan duh ber vawk hi kan intodelh lo em em a, chutih laiin, farm lian han sual ngam kan vâng em em bawk si hi ka vei ṭhin.
Ṭhangthar lehkhathiamte tihhmuhtu kan nih ve hlauh tâkin tiin ka sual chhuak ve tawp mai a ni. Risk lain bul ka ṭan a, systematic taka kal dan tur erawh kum 2/3 vel zir chiang hmasain, farm nei tawhte leh ram páwn thlengin ka enkual nasa. China, Thailand, Myanmar leh Ireland thlengin mi ram farm hlawhtlingte tih dan zirin ka enkual ve a ni," a ti.
CB Lailiankhuma sawi danin, a vawkte chu Thailand aṭanga a chi ṭha bik a lak luh, a vulh pun zelte an ni a, kum khatah vawk notê 2,000 vel a hralh ṭhin. Vawkpui leh a láte nen pui 270 vel a kawl mek a, kuminah vawk 500 tal neih a tum. Vawkpuite'n kum khatah no vawi hnih/thumte an nei a, ṭum khata no 10 tal nei pha lo chu vulh zel tlakah ngai loin a hralh ṭhin. Vawktê chu concentrate feed a pe vek a, siam sa lei loin, a siamna hmanrua la lutin a her chawp a, a tlàwm phah.
An chaw rinpui ber vaimim chu Mizoramah intodelh ni se chuan vawk vulhin hma a sawn hle a rin thu sawiin CB Lailiankhuma chuan, "Tun dinhmunah chuan Bihar aṭangtein vaimim lak luh a ni ṭhin. Ningnáwi khâwm a, a rem rem chhum te, changél leh hnim hnah chhum pek ngawtte hi a sa a tui thei lo. Vawk 4/5 lek kan vulh a, kan chhúng buai a, a hlâwk chuang si lo a, kalphung thlâk a hun tawh. Vawk sa lei dan leh ei dan pawh changkang leh thianghlim zawka kalpui a hun tawh viau a ni," a ti.