Sorkar laipui budget pharh a ni ; Hmarchhak duhsak a ni dawn

Aizawl by pass road leh bamboo link road-ah sum tam tham dah
Union Finance minister Nirmala Sitharaman chuan nimin khan kum 2022-23 atana sorkar laipui sum ruahman (budget) a pharh a; India hmarchhak state-te a bika enkawlna tura Prime Minister’s Development Initiative for Northeast (PM-DevINE) siam a nih tur thu leh chutah chuan cheng vbc. 1,500 dah a nih thu a puang.

PM-DevINE hnuaiah hian Aizawl thlang lama by-pass road siamna turin cheng vbc. 500 dah a ni a, Mizorama bamboo link road siamna atan cheng vbc. 100 dah a ni bawk.

Finance Minister sawi danin, PM-DevINE hnuaia sum dah cheng vbc. 1,500 chu a bul ṭanna tur chauh a ni a, Mizoramin a chang tam ber dawn. 'Aizawl by-pass road on western side' atan cheng vbc.500 dah a nih bakah, Mizoram hmun hrang hranga bamboo link road siamna tur, 'Pilot project for construction of bamboo link road at different locations in various districts in the state of Mizoram,' hnuaiah cheng vbc. 100 dah a ni.

Budget pharh taka PM-DevINE-a sum ruahman zinga dah tamna ber pahnih chu Mizorama hman tur ve ve a ni a, chutih laiin, tuna mi hi chu a bul ṭanna tur sum (initial allocation) chauh a nih thu Finance Minister chuan a sawi.

Nirmala Sitharaman chuan, "Scheme thar PM-DevINE siam a ni dawn a, hei hi North Eastern Council kaltlanga kalpui tur a ni. PM GatiShakti dungthùla hmasawnna ruhrel dinna tur a ni a, hmarchhak state-te khawtlang mamawh mila kalpui a ni ang. Hei hian ṭhalaite leh hmeichhiate tan eizawnna a siamsak dawn bakah, kawng hrang hrangin hmasawnna a thlen dawn a ni" a ti.

Finance Minister chuan, PM-DevINE an siam thar tur chu sorkar laipui leh state-te tana scheme awm sa thlâkna tur a ni dawn lo tih a sawi a; state-in an mamawh project an thlente ngaih pawimawh a nih tur thu a sawi bawk.