Mauah hlawhtlinna hmuh tur a awm lo - CLP Leader Zodintluanga Ralte

Congress Legislature Party (CLP) leader Zodintluanga Ralte leh Congress party mi ṭhenkhat chuan nimin khan Lengpui rama mau chìnna hmun an tlawh a; CLP Leader chuan, mau chìnah hlawhtlinna hmél hmuh tur a awm loh thu a sawi.

Zodintluanga Ralte chuan, mau chìnna hmun an tlawh chhan sawiin, "January 28, 2022 khan Kolasib-a MNF diamond jubilee an lawm ṭumin Chief Minister-in SEDP sem an tum hnaih thu a sawi. SEDP sum sem a nih dawn tâkah hian MNF flagship programme ber mau hi sawi rîk a tlem êm avangin hma an lak tawhnate kan tlawh a ni. Hlawhtlinna hmél hmuh tur a awm loh êm avang hian mau hi an sawi ri tam ngam tawh lo niin a lang," a ti.

MNF unit kaltlangin SEDP dawngtu tur thlanna kalpui mek a ni tih thâwm tun hnaiah a awm thu sawiin CLP Leader chuan, "MNF unit-in sorkar programme-ah thuneihna sang tak an nei niin a lang. Trade hrang hrang thlan tur zingah hian mau thlan tur thâwm a ri tlêm hle a, kuhva, bekang, vaimim leh hmunphiahte chu a langsar a ni," a ti a; Lengpuiah pawh mau chìnna hmun ṭhenkhatah chuan kuhva an chìn tawh thu a sawi.

Zodintluanga Ralte chuan, MNF kaihhruai sorkar chu inrenchemna nei loah puhin, "State sum enkawlah a hlawhchham tih chiang takin a lang. Petrol leh diesel man tihpun vak vak a, mipui náwlpui tawrh ngei ngei tur electric bill tihsan dan thiam ringawt hi phurrit a ni tawh. Mizoram dinhmun siamṭha leh turin finance lama mithiam, sum enkawl thiam leh mi dik, inrenchem thiam kan mamawh a ni," a ti.