African Swine Fever lên lohna State páwn aṭangin vawk lak luh theih

Mizoram páwna vawk hri, African Swine Fever (ASF) lên lohna hmun aṭangin vawk lak luh phal a ni tawh dawn. Vawk la lut turin Animal Husbandry & Veterinary department aṭangin phalna lak hmasak a ngai thung.

Chief secretary Dr Renu Sharma chuan nimin khan hriattirna a chhuah a, "ASF lên avanga ram páwn aṭanga vawk leh vawk sa lâk luh khapna August 9, 2020-a tihchhuah tawh chu Mizoramah ASF thunun tawh a nih avang leh AH & Vety department-in Decem­ber 2021 aṭanga thla hnih chhung hri kai thar report an neih tawh loh avangin hlih rih a ni," a ti a; vawk la lut turte zawm tur a tarlang nghal.

Vawk la lut turte hriat tur
1) Vawk inthlah puntir tur chuan National Action Plan hnuaia SOP zâwmin, vawk inthlah puntirna tur hmun leh a chhehvel an thian thianghlim ngei tur a ni.
2) Vawk puitling/notê la lut tur chuan AH&Vety department aṭangin phalna an la hmasa ngei tur a ni.
3) Vawkte chu hri awm lohna state leh ṭhenawm rama mite chauh lak luh phal a ni a, an hrisel ṭha tihchianna certificate leh CSF vaccination certificate lak tur.
4) Certificate-te hi ainimal checkgate-ah an phawrh thei ngei tur a ni.