KHAWTHLIR

Restricted area
Aizawl bawhsap Dr Lalhriatzuali Ralte chuan, Tanhril Mualkhang rama NERCCDIP hnuaia SIPMIU hna thawhna hmun chu restricted area-ah a puang a, thla hnih chhung awh tur a ni. Restricted area-a puan chhan chu - Aizawl tana Water Treatment Plant kalpui mek hna kal lai tihkhaihlak loh nan te, kháwl hmanga hna thawhna hmun a nih avanga chetsualna thleng thei pumpelh a nih theih nan leh, project area chhungah quarantine centre a awm vangte a ni.

CM Relief Fund
Chief Minister's Relief Fund for Covid-19 ah nimin thleng khan Covid-19 dona atan Rs 31,36,43,967 a lut tawh a, Rs 29,70,30,470 hman tawh niin, hman loh Rs 1,66,13,497 a la awm.

MLA-in enpui
Aizawl South-II bialtu MLA Lalchhuanthanga chuan nimin khan Kulikawn ram chhunga Chêkbâwk rama huan leh ram neitu Chekbawk Farming Society-te harsatna tawh mek a hmunah kalin a enpui a; kut hnathawktute chu an ngaih pawimawh ber zinga mi an ni tih sawiin, theih ang anga an harsatna tawhte ngaihven a, a ṭul anga aupui a tum thu a sawi. Chêkbâwk ramah hian huan thlai siama eizawng chhungkaw 70 vel an awm a ni.

PC thalaite'n phût
Peoples' Conference party ṭhalaite chuan thuchhuah siamin, Provisional Employees Association (PEA)-te sorkara an ngheh ve theihna scheme Mizoram sorkarin a tihtawpsak chu a rang thei ang bera sût turin Mizoram sorkar an phût. PEA-te thil phût hrang hrang bengkhawn duh lo a, tukhum chhah chhawn khum lui tlattu CM Zoramthanga an dem thu an tarlang bawk.

Mamit MJA-in Conference hmang
MJA, Mamit District chuan January 31, Thawhṭanni khan Mamit Press Club-ah Annual Conference vawi 14-na an hmang a, MJA Gen.Hqrs president Zonunsanga Khiangte-in a hmanpui. Mamit district MJA office bearer tur an thlang a; president atan C Lalramdinzela, vice president atan Lalhuma leh treasurer atan Lalrinsanga te an thlang a ni.