Covid-19 Mizoram: January thla chhungin hmuh zat 33,357; chhuak 19,938; thi 65

Kumin January thla chhung khan Mizoramah Covid-19 vei mi 33,357 hmuh chhuah niin, swab sample endik zat aṭanga positive zat (positivity rate) 19.75% a ni a; hripui vei dam tawh mi 19,938 chhuahtir niin, hripui vei zinga mi 65 an thi.

January 2022 chhunga Covid-19 positive hmuh zat hi a hma thla, December 2021-a hmuh zat 6,490 aiin 26,867-in a tam zawk a; kumin January thlaa sample endik zat 1,68,866 aṭanga positivity rate chu 19.75% a nih laiin, December 2021-ah chuan 8.63% chiah a ni. 

Kumin January thlaa Covid-19 vei hmuh tam ber ní chu ni 31 niin, mi 2,531 hmuh chhuah a ni a, hei hi Mizorama hmuh tam ber ní a ni nghal a; hmuh tlem ber ní chu January 1 niin, mi 84 hmuh a ni. Positivity rate san ber ṭum (Jan. 23)-ah 34.07% a ni a, nikum December-ah chuan positivity rate san ber ṭum (Dec. 12)-ah 18.28% a ni thung a, positive hmuh tam ber ní December 5-ah mi 330 hmuh a ni bawk.

Mizorama hripui vei hmuh tam ber thla chu September 2021 kha niin, sample 2,31,281 endik aṭangin positive 34,831 (15.06%) hmuh a ni a, a dawttu January 2022-a mi 33,357 hmuh chu a tam ber thla aiin 1,474-in a tlem zawk.

January 2022 khan hripui vei dam tawh mi 19,938 chhuahtir niin, positive hmuh zat 33,357 aiin 13,419-in a tlem zawk a; chhuak an tam ber ni, ni 31-ah mi 1,740 an chhuak. January thla vek khan hripui vei zinga mi 65 an thi a; thi an tam ber ní, January 29-ah mi paruk an thih laiin, thi awm loh ní ni ruk a awm thung.