MYC Chairman-in ráltlânte a tlawh

Mizoram Youth Commission (MYC) chairman Dr Vanlalṭanpuia, MLA chuan nimin khan a bial, Lunglei North huam chhung Haulawnga Myanmar ráltlânte awmna hmun a tlawh a, ráltlânte dinhmun a enfiah bakah, ṭanpuina a hlân.

Myanmar ráltlânte chu Lunglei North biala Haulawng leh Zotuitlangah dah niin, mi 95 an awm mek a; bialtu MLA hian Haulawnga awmte tan buhfai ip 15, alu ip thum, tél báwmpui thum, bekang sa (nutrella) ip ruk leh Rs 10,000 a pe a, Zotuitlanga awmte tan swab test kit 100, hmai khuhna leh sum fai eng emaw zat a pe a ni.

Dr Vanlalṭanpuia chuan, Myanmar ram buaina vanga Mizorama tlan lutte chu an unaute vek an nih thu sawiin, "Ramin rî nei mah se, hnamin rî a neih loh avangin lungngai suh u. Chief minister Pu Zoramthanga kaihhruai sorkar hian a ngaihthah dawn lo che u. Ka bial chhunga rawn lutte pawh MLA ka nih angin in tan theihtawp ka chhuah dawn a ni," a ti.