SEDP sem tum dan, dan bawhchhiatna leh palzûtnaah ZPM party-in an ngai

ZPM chuan, chief minister Zoramthanga'n mipui sum, Mizoram budget aṭanga SEDP sem tur thlang tura MNF party unit a ruat thu vantlang hriata a puang chu ram dan bawhchhiatna leh dan palzûtna dik tak a nih thu an tarlang a; MNF sorkarin an party mite duhsakna atana mipui sum a suasam dawn a nih chuan ngawi renga an thlir loh tur thu an puang.

CM Zoramthanga'n MNF sorkar flagship programme Socia Economic Development Programme (SEDP) chu kuminah sem a nih tur thu January 28, 2022 khan Kolasib-ah a puang tih sawiin ZPM chuan, SEDP sum dawngtu tur thlang turin MNF unit a ruat nghal thu leh Congress leh ZPM chhungkuate thlang lo turin ualau taka a hrilh thu an tarlang.

ZPM chuan, "Mipui sum budget-a dah, vote zawn nana sem a nih tur thu leh a dawngtu thlang tura party unit a ruat thu CM-in vantlang hriata a puang hi ram dan bawhchhiatna, dan palzûtna dik tak a ni a, Mizoram politics history-ah a la tenawm ber hialah kan ngai. MNF sorkar hian heti mai maia mipui sum a suasam tak tak dawn a nih chuan ngawi rengin kan thlir liam lo ang," an ti.

Kum 2018 inthlanpui dawna MNF auhla chu, NLUP dawng tawh nen lam chhungkaw tin hnenah Rs 3,00,000 aia tlem lo sem a ni tih sawiin ZPM chuan, "MNF president Pu Zoramthanga sawi lai, video hmuh theihin a la awm reng a, chumi beisei chuan MNF chu mipuite'n sorkarna an pe a ni," an ti a; chutih laiin, MLA inthlan hma kum aṭangin MNF party mite hnenah Mizoram budget sem tum a ni leh a dawng tur thlang tura MNF unit hman an tum chu mipui hmuhsitnaa an ngaih thu an sawi.

ZPM chuan, sorkar hnathawkte'n hunbi pangngaiah hlawh an la thei lo a, a chángin sorkarin a hnathawkte hlawh a pûk hial a, pension tharte'n an sum khâwl sorkarin a pe thei lo tih an sawi a, "Hetiang kara party mi, mi tlemtê te hnena Mizoram budget pek tumna awm leh a dawngtu tur thlangtu (agency) atana party unit ruat a ni hian kan sorkar hrawn mek hi mipui sorkar ni loin, party sorkar a nihzia a inpuang chiangah kan ngai," an ti.

ZPM thuchhuah chuan, Pathian leh Mizoram mipui zara sorkarna a chan hunah party sorkar ni loin, ‘Kalphung thar, mipui sorkar’ an din dawn thu an tarlang bawk.